Хойд Солонгосын харвасан дөрвөн баллистик пуужингийн гурав нь Японы эдийн засгийн онцгой бүсэд унасан гэж Японы ерөнхий сайд Шинзо Абе мэдэгдсэнийг CNN дамжууллаа. Парламентад хэлсэн үгэндээ Абе Хойд Солонгос пуужин харвасан нь НҮБ-ын Аюулгүйн зөвлөлийн тогтоолыг зөрчсөн үйлдэл гэдгийг онцолсон байна.

АНУ болон Өмнөд Солонгос хамтарсан цэргийн сургуулилтаа эхлүүлснийг Пхеньян өдөөн хатгалга, цаашид дайралт хийх бэлтгэлээ базааж байна гэж мэдэгдсэн юм. Үүний хариуд ийнхүү дөрвөн ч удаа баллистик пуужин харвасан гэж шинжээчид дүгнэж байна.

Хойд Солонгосын Хойд Пёнган муж дахь Тунчан-ригаас орон нутгийн цагаар даваа гаригийн 07.36 цагт харвасан пуужин 1000 км орчим зай туулаад, Япон тэнгист газардсан гэж Өмнөд Солонгосын Батлан хамгаалах яам мэдэгдсэн юм. Энэ дагуу БНСУ-ын ерөнхийлөгчийн үүрэг гүйцэтгэгч Хван Кё-ан өнөөдөр өглөө Үндэсний аюулгүй байдлын зөвлөлтэй хуралдахаар болсон байна.

С.ЦЭЛМЭГ