Хятадын аялал жуулчлалын салбарын удирдлагууд тус улсын иргэдийг Өмнөд Солонгос руу зорчихгүй байхыг уриалах болжээ. Өмнөд Солонгосын хил дээр Хятадын 100 гаруй жуулчныг хил нэвтрүүлэхээс татгалзаж, заримыг нь тав хоног хүртэлх хугацаанд саатуулсан, түүнээс чухал нь Өмнөд Солонгос пуужингийн довтолгооноос хамгаалах шинэ систем суурилуулсныг Хятад эсэргүүцэж, хариу арга хэмжээ авч эхэлсэн нь энэ гэж шинжээчид дүгнэж байна.

Хятадын Үндэсний аялал жуулчлалын удирдах газраас Өмнөд Солонгост аялах хүсэлтэй иргэдийг “Аялалд гарахаасаа өмнө Өмнөд Солонгосын хил нэвтрүүлэх журамтай бүрэн дүүрэн, сайтар танилцах”-ыг анхааруулах болсон байна. Мөн аялах газар нутгаа сонгохдоо анхааралтай, хянамгай байх тухай ч дурджээ.

Сүүлийн жилүүдэд Хятадын жуулчдын ихээр зорчдог гол газруудын нэг нь Өмнөд Солонгос байсан юм. 2016 оны дүн мэдээгээр тус улсад хөл тавьсан нийт жуулчдын 47 хувь нь зөвхөн Хятадаас иржээ. Ялангуяа аялал жуулчлалын чөлөөт бүс болох Чежү аралд зочлох хятад жуулчдын тоо жилээс жилд өсөн нэмэгдсээр байгаа ажээ. Мэдээж тус арлын эдийн засагт хятад жуулчдын оруулсан хувь нэмэр их бий, гэхдээ 2008 оноос Чежү арал руу визгүй зорчих боломжтой болсноос хойш хятад иргэд тус бүс нутагт гэмт хэрэгт холбогдох нь эрс нэмэгдсэн байна.

2016 оны аравдугаар сард Чежү арлын засаг захиргаа Хятадын 100 гаруй жуулчныг хил нэвтрүүлэхээс татгалзаж, нисэх буудалд саатуулсан юм. Учир шалтгааныг тодорхой тайлбарлаагүй ч энэ явдал хоёр орны харилцаанд сөргөөр нөлөөлсөн гэгддэг. Үүний дараа Өмнөд Солонгос улс Пуужингийн довтолгооноос эсэргүүцэн хамгаалах АНУ-ын хамгийн сүүлийн үеийн THAAD системийг байрлуулсан нь  Бээжингийн дургүйцлийг хүргэжээ. Хятадын зүгээс БНСУ-ын энэ алхам нь АНУ-ын эрх ашгийн төлөө радарын системийг ашиглан Хятадын цэргийн үйл ажиллагааг тагнах зорилготой гэж шүүмжилж байгаа юм.

Харин Сөүл үүнийг няцааж, Хойд Солонгосын сүрдүүлэг, заналхийллээс улсаа хамгаалах цор ганц зорилготой хэмээж байна.

Хятад иргэдийг Өмнөд Солонгост аялахгүй байхыг уриалан сануулсан Бээжингийн энэ шийдвэр БНСУ-ыг чиглэсэн аялал жуулчлалын урсгалыг хаах гэсэн оролдлого гэж тус улсын хэвлэлүүд мэдээлж байна. Харин үүнийг Хятадын талаас үгүйсгэж байгаа юм.

С.ЦЭЛМЭГ