Америк хөлбөмбөгийн аварга шалгаруулах тэмцээн Монголд анх удаа зохион байгуулагдлаа. Хүчний тоглолтгүй төрөл болох flag football-ын дүрмээр явагдсан тус тэмцээнд зургаан баг оролцсоноос Монголын спортын менежментийн агентлагийн залуус түрүүлж, анхдугаар тэмцээний цомын эзэд болжээ.

Америк хөлбөмбөгийн гурван төрөл бий. Та бидний мэдэх NFL буюу мэргэжлийн хөлбөмбөгийн лиг tackle football-ын дүрмээр явагддаг. Өөрөөр хэлбэл, өрсөлдөгчөө зогсоохын тулд заавал унагах шаардлагатай. Биеийн хүчний тоглолтыг дээд зэргээр хийнэ гэсэн үг. Харин дараагийн төрөл болох touch football нь өрсөлдөгчдөө хоёр гараараа хүрэх ёстой. Тэгвэл, flag football нь өрсөлдөгчийнхөө бүсэлхийнд зүүсэн тугийг татаж авснаар довтолгоог нь зогсоодог дүрэмтэй. Үндсэндээ эдгээр төрлүүд биеийн хүчний тоглолт үзүүлэх хэм хэмжээгээрээ өөр хоорондоо ялгаатай. Тиймээс ч flag football-ын “нон контакт” гэж тодорхойлдог юм.

Монголд анх удаа зохион байгуулсан flag football-ын тэмцээнд оролцогч зургаан багийг хоёр хэсэгт хуваагдан тойргийн системээр тогложээ. Улмаар финалд тэмцээний ивээн тэтгэгч “Принс Уорлд” болон Монголын спортын менежментийн агентлагийн баг тунаж үлдсэн байна. Аваргын төлөөх тоглолт  хүчтэй өрнөж, 16:12 харьцаатай Монголын спортын менежментийн агентлагийн залуус хожсоноор анхдугаар тэмцээний аварга болжээ. Үүгээр Америк хөлбөмбөгийн Монгол дахь хөгжлийн суурь тавигдлаа гэж болно. Цаашид сонирхогчдын тоо улам бүр нэмэгдэнэ гэдэгт зохион байгуулагчид тун итгэлтэй байсан юм.

Америк хөлбөмбөгийн Монгол дахь нийгэмлэг цаашид олон ажил хийхээр төлөвлөжээ. Тухайлбал ирэх намар  дээд лигийн тэмцээн зохион байгуулах юм байна. Баг клубуудыг дүүргүүдэд байрлуулж нэлээд өргөн хүрээг хамарсан сонирхолтой арга хэмжээ зохион байгуулахаар ажиллаж байгаа гэсэн.