Дэлхийн энхийн их наадам ТББ-ын санаачлагаар зохион байгуулж буй “Хүн гүрнээс гаралтай ард түмний энхийн их наадам”-ын хүрээнд “Арван төгрөгийн хүч” аяныг өрнүүлж эхэллээ. Аяны туршид хуримтлагдсан хандивын мөнгөөр “Хүүхдийн орчныг ногоон бүс болгох” зорилготой хэд хэдэн ажлыг хийхээр төлөвлөөд байгаа юм байна. Үүнд, ЭНЭШТ-ийн дэргэдэх цэцэрлэгт хүрээлэнг сэргээх, Улсын клиникийн нэгдүгээр амаржих газрын гадна талбайг тохижуулах, цэцэрлэгжүүлэхээс гадна хараа хяналтгүй, өнчин, ядуу хүүхдүүдийн нийгмийн асуудлыг дэмжин Дархан-Уул аймгийн “Нарны хүүхдүүд” асрамжийн газарт туслах гэнэ. Зохион байгуулагчид “Арван төгрөгийн хүч” аяныг нийслэл хотноо “Централ таур”, “Бөхийн өргөө, “Гурван гал”, “Теди” төв зэрэг олны хөлийн газар явуулын цэгээр ажиллуулж байгаа юм. Энэхүү үйл ажиллагаанд 50 гаруй залуус нэгдэн нийтэд сурталчлах ажилд хүчин зүтгэж байна.