Монголын чөлөөт бөхийн эмэгтэй шилдэг тамирчдын нэг дэлхийн аваргын мөнгө, хүрэл медальт Д.Отгонцэцэг Гавьяат тамирчин цол хүртэхээр болжээ. “Хасу мегастарс” клубын тамирчин тэрбээр 2011 онд ДАШТ-ээс мөнгөн медаль хүртэж байсан юм. "Лондон 2012" олимпийн наадмын дараа спортоосоо түр завсарлаж, хүүтэй болсон ч Д.Отгонцэцэг дэвжээндээ эргэн гарсан. Удалгүй формдоо орсон тэрбээр 2016 онд Азийн аварга болж, улмаар ДАШТ-ээс хүрэл медаль хүртсэн юм. Ийнхүү ДАШТ-ий хос медальт, Азийн аварга тамирчин маань Гавьяат тамирчин цолоо ирэх баасан гаригт авахаар болжээ.
Дэлхийн нэгдсэн бөхийн холбооноос гаргасан хоёрдугаар сарын чансаагаар тэрбээр 55 кг-ын жинд гуравт бичигдэж байна.
"Хасу Мегаватт" клубын тамирчин тэрбээр дасгалжуулагч Ц.Баярсайханы удирдлагад бэлтгэлээ хийдэг.
Д.Отгонцэцэг чөлөөт бөхийн ОУХМ, Улсын шүүгч Г.Амархүүтэй гэр бүл болсон юм.
Ч.БОЛОР
