Сирийн хамгийн их хүн амтай Алеппо хотын түүх Христийн тооллоос 6000 жилийн өмнөөс эхтэй. ЮНЕСКО-гийн дэлхийн өвд бүртгэгдсэн олон барилга, байгууламжтай Алеппо хотыг эрт цагт Торгоны зам дайрч байсан бол 1869 онд Суэцийн сувгийг нээснээр зүүн, барууныг холбосон худалдааны замын гол чиглэл болж байв.
Алеппо хот дайн эхлэхээс өмнө 2.3 сая орчим хүн амтай, аж үйлдвэр, санхүүгийн төв байлаа. Үзэсгэлэнт Алеппо хот Сирийг зорих жуулчдын хамгийн ихээр зорчдог хотуудын нэг байлаа.
Алеппо хот XIII зуунд ид цэцэглэн хөгжиж байсан ч 1260 онд монголчуудын дайралтад өртөж байсан түүх бий. Доголон Төмөр хааны байлдан дагууллын үед буюу 1348 онд хотод тахал гарч, олон зуун хүн амиа алдаж байжээ. Монголчуудын дайралтын дараа Османы эзэнт гүрний дор Алеппо хот Дорныг Европтой холбосон худалдааны гол зам болсон юм. Орчин үеийн Сири дэлхийн I дайны дараа байгуулагдаж, 1945 онд тусгаар тогтнолоо зарласнаар Алеппо хот нийслэл Дамасктай өрсөлдөхүйц хэмжээний аж үйлдвэрийн төв болон хөгжиж, хүн амын тоо 300 мянгаас 2.3 сая болж нэмэгджээ. Гэвч Сирийн иргэний дайнаас хойш өдгөө Алеппод 275 мянган хүн бүслэлтэд амьдарч байна.
Ерөнхийлөгч Башар аль-Ассадыг суудлаас нь буулгахын төлөөх тэмцлээр эхэлсэн иргэний дайны улмаас Сирийн хойд хэсгийн Алеппо хотод 2012 оны долдугаар сард эхний бөмбөгийг хаяжээ. 2015 оны есдүгээр сараас ОХУ агаараас цохилт өгч эхэлснээр сүйрлийн хэмжээ үлэмж нэмэгдсэн байна. Сирид 2011 онд эхэлж, бүхэл бүтэн зургаан жил үргэлжилж буй иргэний дайнд 400 мянган хүн амь үрэгдээд байна. Энэ бол энх цаг, XXI зуунд тохиож буй аймшигтай, хар дарсан амьдрал.
Сирийн сөргөлдөгч талууд өнгөрсөн арванхоёрдугаар сарын 15-нд гал зогсоох хэлэлцээнд хүрснээс долоо хоногийн дараа Засгийн газар Алеппо хотод хяналтаа тогтоосноо зарлаад байгаа. Засгийн газар өнгөрсөн арваннэгдүгээр сараас хойш Алеппод эрчимтэй дайралт хийснээр босогчид ухарч эхэлсэн бөгөөд Улмаар Турк, ОХУ-ын зуучлалаар дамжуулан Сирийн талууд гал зогсоох тохиролцоонд хүрчээ.
Исламын шашны суннит урсгалыг баримтлагч босогчдын бүлгийг АНУ, Саудын Араб, Турк улсууд дэмжиж байгаа бол Башар аль-Ассадын талд Иран, ОХУ зогсч буй.
Алеппо хотын нэрийн хуудас болсон XIII зууны үеийн цайз бөмбөгдөлтийн улмаас гэмтжээ. Цайзыг Сирийн Засгийн газрын арми хамгаалалтын гол түшиц газар болгож байснаас босогчдын дайралтад илүүтэй өртсөн байна.
Цайзын баруун талд орших Их сүмийг VIII-XIII зууны хооронд барьж босгосон ч өдгөө балгас л үлджээ. Сүмийн XI зуунд баригдсан 45 метр өндөр цамхагийг 2013 онд нураасан байна.
XII зуунд байгуулагдсан аль-Шибани сургууль нь Их сүмийн өмнө талд оршдог бөгөөд сэргээн засварласны дараа урлагийн тоглолт, үзэсгэлэн зохион байгуулах гол газар болж байжээ.
XIII зуунд байгуулагдсан Хаммам аль-Нахасин хар зах нь сүмийн өмнө хэсэгт Алеппо хотын төвд оршдог байв. Тус захад байрлах эрэгтэйчүүдийн халуун усны газарт жуулчид ихээр очдог байжээ.
Худалдааны төвийг Исламын улс зэвсэгт бүлэглэл Сирийн аль-Нусра жихад бүлэглэлээс эзэлж авсныхаа дараа шорон болгон ашиглах болжээ.
