Нийслэлийн байгаль орчны газар, “Технож” бизнес инкубатор төв ТББ хамтран “Гялгар уутнаас татгалзах өдөр” хөдөлгөөн өрнүүлж байгаагаа өчигдөр /2017.02.10/ Нийслэлийн хэвлэл мэдээллийн төвд мэдэгдлээ. Уг хөдөлгөөнийг өрнүүлж гялгар уутны хор уршгийг таниулж, зохистой хэрэглээний соёлыг төлөвшүүлэх нөлөөллийг хийснээр байгаль орчны болон хүний эрүүл мэндийг хамгаалах замаар ногоон хөгжилд хүрэх алхамд бодитой хувь нэмэр оруулах гэнэ. Тус байгууллагаас цагаан сарын баяр ойртсонтой холбогдуулж “Ногоон дадал зуршлыг хэвшүүлцгээе, даавуун тор, улавчаа бэлэглэе” гэсэн эко уриалгыг гаргаж байгаагаа мэдэгдээд дараах судалгааг танилцууллаа.
Цагаан сарын баярын өмнөх бэлтгэл ажилд нэг өрх дунджаар 20 орчим тор худалдан авч байна. Нийслэлд одоогоор 380 мянга гаруй өрх байгаа гэж бодоход 7.6 сая гялгар уутан торыг цагаан сарын худалдан авдаг ажээ. Тэдгээрийг авахад 760 саяаас нэг тэрбум 520 сая төгрөгийг зарцуулж байна.
Улсын хэмжээнд цэцэрлэгт хамрагдсан 105.085 хүүхэд байгаа. Хүүхдээ цэцэрлэгт өгч, авахдаа өдөрт нэг ширхэг гялгар уутан улавч хэрэглэдэг гэж үзвэл өдөрт 10.508.500, сард 231.187.000 цаашлаад жилд 2.080.683.000 ширхэг уутыг зөвхөн цэцэрлэгийн улавчинд зарцуулж. Энэ хэмжээний хог хаягдлыг “Цэцэрлэгийн цэнхэр улавч”-наас гаргадаг байна.
Дэлхийн улс орнууд хог хаягдлыг багасгахад анхаарч түүнийг шатаах, газрын хөрсөнд буулгах зэрэг аргаас татгалзаж, 3R ( Reduce, Reuse, Recycle ) буюу хог хаягдлыг багасгах, дахин ашиглах, боловсруулах технологийг нэвтрүүлж байна гээд олон удаа ашиглах даавуун тор, улавчийг нэвтрүүлснээр их хэмжээний гялгах уутыг хог болох, байгаль орчин бохирдуулахаас сэргийлнэ гэлээ.
“Хуучин бол айл бүр хүнсээ цуглуулах цаасан болон даавуун ууттай байсан. Цаасан уут тийм ч таатай биш харин даавуун уут нь байгальд ээлтэй. Даавуун уут хэрэглэхийг уриалж буй зарим байгууллага, аж ахуй нэгжүүдийг бодлогын зүгээс төрөөс дэмжиж ажиллаж байгаа” гэж Нийслэлийн байгаль орчны газрын орлогч дарга С.Санжмятав хэллээ.
Харин тус хөдөлгөөнийг санаачлагч “Технож” Бизнес инкубатор төвийн захирал Г.Галаарийдий энэ талаар “Гялгар уут маш хямдхан учраас хаа сайгүй ашиглагддаг, үнэ цэнэгүй хэрнээ байгаль орчныг ноцтой хордуулдаг. Өнөөдөр 135-р цэцэрлэг даавуун улавчийг хэвшүүлээд маш амжилттай явж байна. Нийслэлийн зүгээс сар бүрийн архигүй өдөр гэдэг шиг сар бүрийн нэг өдрийг гялгар уутнаас татгалзах өдөр болгох талаар тодорхой хэмжээний судалгаа хийж байгаа. Энэ бүхэн удахгүй хэрэгжих байх гэж найдаж байна” гэлээ.
Улаанбаатар хотоос зуны улиралд гялгар уут, хуванцар хог 22 хувь, өвлийн улиралд 14 хувь гардаг гэсэн судалгааг Жайка Олон улсын байгууллагаас гаргажээ. Иймээс хөрсөн дээр шингэлгүй 400 жил болдог гялгар уутнаас татгалзаж даавуун уут болон улавч хэрэглэж хэвшихийг уриаллаа.
Г.БАТТҮШИГ
