МАН-ын Удирдах зөвлөлийн энэ сарын 17-ны өдрийн хуралдаанаар “Эрдэнэт” үйлдвэрийн 49 хувийг төрд буцаан авах асуудлыг хэлэлцсэн, МАН-ын дарга М.Энхболд тус хуралдаанд оролцсон гэх мэдээлэл хэвлэлээр цацагдсан билээ. 

Тэгвэл УИХ дахь МАН-ын бүлгийн дарга Д.Хаянхярваа өнөөдөр уг асуудалтай холбоотойгоор тайлбар хийлээ.

Тэрбээр “МАН-ын дарга М.Энхболд “Эрдэнэт”-ийн 49 хувийг улсад буцааж авахаар боллоо гэсэн худал мэдээлэл өнгөрсөн долоо хоногт олон нийтэд цацагдсан. Бүлгийн хурал дээр “Эрдэнэт” үйлдвэртэй холбоотой асуудал яригдаагүй. “Эрдэнэт”-ийн 49 хувийг шалгах тухай асуудлаар УИХ-ын даргын захирамжийн дагуу ажлын хэсэг байгуулагдсан. Энэ долоо хоногт тэр ажлын хэсэг зарчмын дагуу Байнгын хороон дээр ажил танилцуулна. Шаардлагатай гэж үзвэл УИХ дахь намын бүлгүүдэд танилцуулна гэсэн байр суурьтай байгаа. Иргэдэд хандаж хэлэхэд, Тавантолгой, "Эрдэнэт" үйлдвэртэй холбогдсон асуудлаар худал мэдээлэл нэлээд цацагдаж байгааг анхаарна уу. Иймэрхүү худал асуудал Монголын гадаад, дотоодын харилцаанд сөргөөр нөлөөлнө. Өөрөөр хэлбэл, бүлэг шийдвэр гаргаад "Эрдэнэт"-ийн 49 хувийг буцаагаад авчих юм байна. Тавантолгойн төслийг 400 сая ам.доллараар худалдчих юм байна гэдэг худал мэдээллийг түгээснээр эдийн засагт сөрөг нөлөө үзүүлнэ шүү дээ” гэлээ.

Т.ДАВААНЯМ