Монгол Улсад төрийн айлчлал хийж байгаа Энэтхэгийн Ерөнхийлөгч хатагтай Пратибха Девисингх Патал сая Хан-Уул дүүргийн Жаргалан хотхон дахь Энэтхэгийн удирдагч Махатма Гандийн хөшөөнд хүндэтгэл үзүүллээ. Түүнийг очиход Монгол дахь энэтхэг иргэдийн төлөөлөгчид сав дүүрэн цэцгийн дэлбээ барьж угтсан юм. Махатма Гандийн хөшөөний өлмийд энэтхэг заншлаар цэцгийн дэлбээ цацаж баглаа цэцэг өргөхөд тэнд цугларагсад Махатма Гандийн тухай дуулцгааж байв.

Мөн монгол сурагчид энэтхэг дуу дуулж, Дашчойлин хийдийн лам хуврагууд бурхны ном айлдлаа. Хөшөөнд цэцэг өргөхөд зөөлөн бороо шивэрч байв.