“Лондон-2012” зуны XXX олимпийн наадам эхлэхэд нэг жилийн хугацаа үлдээд буй энэ үед олимпийн наадмын бас нэгэн чухал хүчин зүйл болох медалийн дүр төрхийг олон нийтэд танилцууллаа. Медалийн нэг талд Грекийн эртний Парфенон сүмийн өмнө Грекийн ялалтын бурхан Ника байгаагаар дүрсэлсэн бол нөгөө талд нь “Лондон-2012” олимпийн логог сийлжээ. Олимпийн медалийг олон нийтэд танилцуулах ёслол өчигдөр Трафальгарын талбайд болж, олон мянган иргэд цугласан байна. Энэ үеэр Британийн Ерөнхий сайд Дэвид Камерон Лондонгийн олимп хамгийн гайхалтай олимпийн наадам болно гэдгийг амлажээ. Энэхүү ёслолд ОУОХ-ны ерөнхийлөгч Жак Рогге болон Лондон хотын мэр Борис Жонсон нарын албаны хүмүүс оролцсон байна.

“Лондон-2012” олимпийн медальтай холбоотой зарим баримтууд:

• Олимпийн наадмын медаль нь 85 мм-ийн диаметртай, 7 мм зузаан бөгөөд 375-400 грам жинтэй аж
• Метал эдлэлийн загвар зохион бүтээгч Дэвид Уоткинс медалийн загварыг гаргажээ
• 30 гаруй цэнгэлдэх, талбайд болох олимпийн медаль гардуулах ёслолын үеэр нийт 2100 медалийг тамирчдад гардуулна
• Спортын төрөл, зай бүрийг тухайн медалийн хүрээгээр сийлсэн байх гэнэ.