Монгол Улсын Засгийн газар орон гэргүй, нийгмийн эмзэг бүлгийн иргэдээ хоол тэжээлээр хангах хөтөлбөрийг хэрэгжүүлж эхэлсэн билээ. Уг хөтөлбөрийг анх нэг жилийн хугацаанд хэрэгжүүлнэ гэж байсан юм. Тэгвэл Засгийн газрын тогтоолоор баталсан “Нийгмийн эмзэг бүлэгт хоол, тэжээлийн дэмжлэг үзүүлэх дэд хөтөлбөр”-т 2010-2011 гэж заасныг 2010-2012 хэмээн өөрчлөх шийдвэрийг Засгийн газрын өчигдрийн хуралдаанаар гаргалаа. Хөтөлбөрийг хэрэгжүүлэхэд дэмжлэг үзүүлж байгаа Азийн хөгжлийн банк “Хүнс, тэжээл, нийгмийн халамжийн төсөл”-ийг хэрэгжүүлэх хугацааг нэг жилээр сунгажээ. Энэ нь “Нийгмийн эмзэг бүлэгт хоол, тэжээлийн дэмжлэг үзүүлэх дэд хөтөлбөр”-ийн хугацааг сунгах гол шалтгаан болсон аж. Тиймээс хөтөлбөрийг үргэлжлүүлэн хэрэгжүүлэхэд шаар­дагдах санхүүжилтийн асуудлыг шийдэх үлдлээ. Ямартай ч “Хөтөлбөрийг  хэрэгжүүлэхэд ирэх онд 10 тэрбум төгрөгийн нэмэлт сан­хүүжилт шаардлагатай” гэсэн тоо­цоог Нийгмийн хамгаалал, хөдөл­мөрийн яамнаас гаргасан байна.

Хөтөлбөрийг хүнсний бүтээгдэ­хүүний үнийн өсөлтөөс шалтгаалсан эрсдэлт хүчин зүйлийн хяналт, тандалтыг сайжруулах, урьдчилан сэргийлэх арга хэмжээ авах, хүнсний нөхөн олговор олгох замаар орлого багатай өрхийн хүн амын хоол, тэжээлийн дутагдлыг бууруулах зорилгоор баталсан. Бас өөр нэг зорилго нь нийгмийн халамжийн тогтол­цоог сайжруулах явдал байв.  Энэ дагуу орлого багатай иргэд хүнсний хэрэглээний гол бүтээг­дэ­хүүнийг тогтвортой үнээр худал­дан авах  боломжтой  болсон билээ. Засгийн газрын өчигдрийн хурал­дааны үеэр Нийгмийн хамгаалал, хөдөлмөрийн сайд Т.Ганди “Хүнсний тало­ныг 2009 оны нэгдүгээр са­раас олгохоор төлөвлөсөн байсан юм.  Гэвч дэмжлэг шаардлагатай иргэдийн жагсаалт гаргах, жагсаалтад багтсан иргэн бүрийн амьдралын нөхцөлийг судлан хөтөл­бөрт хамруулах шаардлагатай эсэхийг төрийн бус байгууллагаар тодор­хойлуулах, хүнсний талон олгох журам боловсруулах зэргийг хийхэд цаг багагүй шаардагдсанаас талоныг төлөвлөсөн хугацаанаас хоцорч олгож эхэлсэн” гэсэн юм. Ямартай ч хөтөлбөр хэрэгжиж эхэлсэн 2009 оны арваннэгдүгээр сарын 1-нээс 2010 оны наймдугаар сарын 31-ний хооронд хөтөлбөрт хамрагдсан 25 мянга гаруй иргэн  нийт нэг тэрбум 127 сая гаруй төгрөгийн хүнсний талон авчээ.