УИХ-ын гишүүн С.Жавхлан Тусгаар тогтнол, эв нэгдэл намын дарга Г.Уянгатай хамтран улс төр хийхээр боллоо. Тэдний хамтын ажиллагаа хэр урт удаан настай байх бол.

Экс гишүүн Г.Уянгын хувьд өнгөрсөн дөрвөн жилд тууштай улстөрч болохоо харуулж чадаагүй. 2012 оны УИХ-ын сонгуульд МҮАН-аас нэр дэвшин өрсөлдөж, УИХ-д сонгогдсон ч намынхаа бодлогыг тууштай дэмжээгүйгээр барахгүй эцэст нь өрх тусгаарлаж, Тусгаар тогтнол эв нэгдэл намд элсэж байв.

УИХ-ын эмэгтэй гишүүд дотроос Л.Эрдэнэчимэг гишүүнтэй ойрхон нөхөрлөсөн ч сонгуулийн үеэр түүнийг хэн ч биш болгож хувирган, итгэж үл болох хүн гэдгээ харуулаад амжсан. Тийм учраас л олон нийт Г.Уянга, С.Жавхлан хоёрын хамтын ажиллагаа хэр урт удаан настай байх бол гэж “шохоорхоод” эхэлсэн хэрэг.

Огцруулах асуудлыг барьж авсан нь УИХ-ын гишүүн С.Жавхлангийн хувьд “цоо шинэ” ажил байж болох ч экс гишүүн Г.Уянгын хувьд хуучин улиг болсон ажил. Өнгөрсөн дөрвөн жилд хэчнээн ч олон хүнийг огцруулахаар асуудал тавилаа даа, тэр бүгд бүтэлгүй болж байв. Ер нь ч тэгээд шинэковуудын хувьд улс төрд тодрох боломж нь хэн нэгнийг огцруулах улстөр хийж, гоцлох байдаг. Тийм л нэг явахгүй технологи барьж авлаа, С.Жавхлан.

Г.ХОРОЛ