Жил бүрийн зун уламжлал ёсоор энд тэндгүй зам засварын ажил өрнөж байгаа. Эхнээсээ ч зам засварын ажлыг хүлээлгэн өгч байгаа. Зам засварын үед хамгийн их сүйтгэгддэг зүйл бол ногоон байгууламж. Хэдийгээр хэрүүл амтай замаа хүлээлгэж өгсөн ч замын дэргэдэх явган хүний зам болон хуучин байсан ногоон байгууламж сүйтгэгдсэн хэвээр үлддэг. Уг нь зам засварын ажил гүйцэтгэгч компанийг тендерт шалгаруулахдаа тохижилт, явган хүний зам, ногоон байгууламжийг хуучин хэвэнд нь оруулж засч, цэвэрлэх ёстой байдаг. Төсөв мөнгийг нь ч багтаасан байдаг гэнэ. Харин зам засвар хийж байгаа компаниуд үндсэн ажил болох замаа засаад л үлдсэнийг нь орхидог. Үүнээс болж хотын өнгө үзэмж, ногоон байгууламж устаж байгааг тэр бүр ойшоодоггүй юм байна. Гэрээ ёсоороо бол Авто замын газар нь энэ бүгдийг бүрэн хүлээж авах учиртай. Харин хүлээн авч байгаа нь ч хүлээлгэн өгч байгаа нь ч энэ асуудлыг үл тооно.

Нийслэлийн Захирагчийн ажлын абаны Хот нийтийн аж ахуй хэлтсийн дарга Ц.Тунгалаг хэлэхдээ “Замын компаниуд ногоон байгууламж сүйтгэвэл түүнийгээ өөрсдөө хийх ёстой. Төсөв мөнгө нь багтсан учраас хийж гүйцэтгэх шаардлагатай. Гэвч манай замын компаниуд үүнийгээ орхигдуулаад байдаг. Дараа нь нийслэл өөрийн хөрөнгөөр хийх шаардлага гардаг. Холбогдох газрууд нь замаа хүлээж авахдаа гэрээ ёсоор ногоон байгууламжийг сэргээсэн эсэхийг шалгаж хүлээж авах хэрэгтэй” гэв. Зам засварын ажил  хийдэг компаниудад шаардлага тавихаар дараа нь, удахгүй хийнэ гэсэн тайлбар өгдөг гэх. Гэвч тэд энэ хэлсэн үгэндээ хүрдэг болов уу. Яг өнөөдөр л гэхэд байдал ямар байгааг сонирхоцгооё.

Жишээлбэл, Цэцэг төвийн замыг нээгээд долоо хонож байна. Гэтэл замын хажуугийн зүлэг, явган хүний замыг хэн хэзээ янзлах юм бол доо. Хийчихнэ гээд хүлээж суусаар өвлийг угтах вий дээ.  Нуухыг нь авах гээд нүдийг нь сохлов гэгчээр… Ямартай шинээр тавьж байгаа болон засварлаж дууссан замуудыг эргэвэл нэг иймэрхүү л дүр зурагтай байна. Харин үүнийг хэн цэвэрлэж, цэгцэлж, засах юм бол оо.