Хүнийг мөчлөөд уутанд хийгээд хаясан, толгойгүй цогцос олдсон, 76 хутгалж амь насыг нь хохироосон гээд сонсохоос ч хэртхийм гэмт хэрэг гардаг болж.  Хууль зүй, дотоод хэргийн яамнаас өчигдөр гэмт хэр­гийн нөхцөл байдлын та­лаар мэдээлэл хийлээ. Хо­ногт улсын хэмжээнд 56, нийслэлд 31 гэмт хэрэг  бүрт­гэгдэж, гэмт хэргийн 55.4 хувь нь нийслэлд гарч байна гэв.  Мөн хоногт гэмт хэргийн улмаас гурван хүн нас барж, 23 хүн гэмтэж байгаа аж. Зөвхөн энэ оны эхний хагаст гэмт хэргийн улмаас насанд хүрээгүй 29 хүн нас барж, 172 хүн гэмтэж байгаа аж. Мөн цагдаагийн газраас хүнийг санаатай алах, хүчиндэх, дээ­рэм­дэх, танхайрах, за­мын хөдөлгөөний аюулгүй байдлын эсрэг хэргүүд өсөх хандлагатай байна гэж мэдэгдлээ. Сүүлийн үед хү­ний амь онц хэрцгийгээр хөнөөсөн, энэ хэргийг на­санд хүрээгүй хүүхэд үйл­дэх тохиолдол нэг бус удаа гарч байсан. Мөн хүн барьцаалсан гээд киноноос үздэг байсан зүйлүүд бодит амьд­рал дээр сонсогддог болжээ.

Улсын хэмжээнд энэ  ха­гас жилийн байдлаар  10 мянга 116 гэмт хэрэг бүрт­гэгд­­сэн бөгөөд өнгөрсөн онтой харьцуулбал 2,4 ху­виар өссөн үзүүлэлт юм.  Энэ нь  18-аас дээш насны 10 мянган хүн тутамд 55 хэрэг ноогдож байна гэсэн үг. Улсын хэмжээнд гарч буй гэмт хэргийн тал хувь нь нийслэлд  бүртгэгджээ. Төв, Хэнтий, Завхан, Хөвсгөл зэрэг найман аймагт гэмт хэрэг өссөн бол 14 аймагт буурсан үзүүлэлттэй байна.  Мөн нийслэлийн Сүхбаатар, Чингэлтэй, Хан-Уул дүүрэгт гэмт хэргийн гаралт өсчээ. Нийт гэмт хэргийн 40,6 хувь нь хөнгөн, 47 хувь нь хүндэвтэр, 9,8 хувь нь хүнд, 2,6 хувь нь онц хүнд гэмт хэрэг байна. Өнгөрсөн онтой харьцуулбал онц хүнд гэмт хэрэг 31,2 хувиар, хүндэвтэр гэмт хэрэг 2,3 хувиар, хөн­гөн гэмт хэрэг 3,5 хувиар өссөн бол хүнд гэмт хэргийн гаралт 6,8 хувиар буурсан үзүүлэлт гарчээ. Гэмт хэ­рэгт нийт есөн мянга 273 хүн холбогдсоны 11 хувь нь эмэгтэй,  7,4 хувь нь хүү­хэд, 63,7 хувь нь 18-34 насны байсан байна. Харин тал хувь буюу 57 хувь нь эрхэлсэн тодорхой ажилгүй иргэд байжээ. Мөн 5,7 хувь нь ял шийтгэл эдэлж байсан хүмүүс байжээ.  Нийт гарсан гэмт хэргийн хёор мянга 302 нь согтуугаар үйлдэгджээ.  Мөн хүүхэд оролцсон хэрэг 48 хувиар, эмэгтэй хүн оролцсон хэрэг 6,4 хувиар өссөн үзүүлэлт гарсан бай­на. Гэмт хэргийн улмаас амиа алдсан хүний тоо 570 болсны дийлэнх нь 18-44 насны залуус ажээ.Үүнээс гадна найман аймаг, таван дүүрэг, төмөр замын салбарт гэмт хэргийн гаралт буурсан сайшаалтай үзүүлэлт ч бас байна.  Тухайлбал Говь-Алтай, Орхон, Ховд, Сэлэнгэ, нийслэлийн Бага­хангай, Баянзүрх, Налайх зэрэг дүүргүүдэд гэмт хэргийн гаралт буурчээ.

Өнгөрсөн онд буюу 2010 оны эхний таван сард гэмт хэргийн улмаас амиа алдсан хүний тоо 541 байсан юм. Харин гэмтэж бэртсэн хүний тоо дөрвөн мянга 58 болсон нь өмнөх оны мөн үеэс 22,7 хувиар өссөн үзүүлэлт байна.Харин гэмт хэргийн илрүүлэлт 58,1 хувьтай бай­гаа­гаас хөнгөн гэмт хэргийн илрүүлэлт 52,4, хүндэвтэр гэмт хэргийнх 57,6, хүнд гэмт хэргийнх 74,2, онц хүнд гэмт хэргийн илрүүлэлт 90,5 хувьтай байгаа ажээ. Гэмт хэргийн илрүүлэлт өн­гөр­сөн оны мөн үеэс 18 хувиар өссөн үзүүлэлттэй байна. Хүний амь насыг санаатайгаар бүрэлгэх хэрэг 1,2 хувиар, бусдын биед зориу­даар гэмтэл учруулах хэрэг 29,2 хувиар, хүчингийн гэмт хэрэг 2,1 хувиар тус тус өссөн бол булаах, хулгайлах, залилах зэрэг хэрэг буурчээ. Гэвч хулгайн хэрэг дотроо малын хулгай, халаасны хулгай, автомашиныг тонож хулгайлах зэрэг хэрэг өсч буйг иргэдэд анхааруулж байна.

Өнгөрсөн хугацаанд хүн худалдах гэмт хэрэг дө­рөв бүртгэгдсэн бол ман­суу­ралтай холбоотой есөн хэрэг бүртгэгджээ.  Хүн худал­даа­лах, хар тамхины хэрэг их л хоол санагддаг байсан бол одоо бидний дунд болсон гэж сонсогдох нь харамстаар ч иргэд өөрсдөө сонор сэрэмжтэй байхад илүүдэхгүй биз.  Энэ оны эх­ний хагас жилийн байдлаар гэмт хэргийн  халдлагад 9692 хүн, 122 байгууллага өртөж хохирсоноос 570 хүн нас барж, 4058 хүн гэм­тэж, улсын, хувийн болон нийтийн эзэмшлийн талбайд  14 тэрбум төгрөгийн хохирол учирсаны 6.3 тэрбум буюу 43.6 хувийг нөхөн төлүүлсэн байна.