Хоёр хүртэлх насны хүүхэд хоол тэжээлийн дутагдалд орсон бол дахин тэрхүү амин дэмээ нөхөж олох боломжгүй болж өсөлт нь зогсч, хөдөлгөөний дутагдалд орох аюултай ажээ. Энэхүү өвчиний эсрэг Сонгинохайрхан дүүргийн харьяа “Хүүхдийн клиник сувилал 41”  ясли цэцэрлэгийнхэн ‘’Бага насны хүүхдийн хоол тэжээлийн архаг дутлыг бууруулах” төслийг боловсруулж JFPR 9131 Азийн хөгжлийн банкны санхүүжилтээр хэрэгжүүлж эхэлсэн тухайгаа өчигдөр тайлагнасан юм. Энэ төслийн хүрээнд хоол тэжээлийн дутагдалд орсон хүүхдэд эрчимтэй эмчилгээ, сувилгаа явуулж биеийг нь эмчлэх, баяжуулсан хоол хүнсээр дамжуулан алдагдсан жин, өсөлтийг хэвийн болгох, эцэг, эх, сувилагчдад сургалт зохион байгуулах зэрэг үйл ажиллагаа явуулсан байна. Өнгөрсөн зургадугаар сарын 6-нд төсөл эхлэхэд хамрагдсан хүүхэд нэг сарын дотор 800 гр жин нэмэгдэж, бие бялдарын хувьд эрүүлжлээ хэмээн тус клиникийн Ерөнхий эмч П.Саранцэцэг  хэлж байсан. 

Төслийн хүрээнд Сонгинохайрхан дүүргийн амьжиргааны төвшин доо­гуур гэр бүлийн хүүхдүүдээс сонгон авсан байна. Нэг ангид ой, дөрвөн сартайгаас, хоёр нас хүртэлх 25 хүүхдийг хамруулжээ. Тус клиникийн ерөнхий эмч П.Саранцэцэгээс  хүүхдүү­дийн талаар тодрууллаа.

-Хоол тэжээлийн дутагдалд ор­сон хүүхдэд хүнсний нэмэлт бүтээг­дэ­хүүнийг өгөх нь зөв үү?

-Миний хувьд хүнсний нэмэлт бүтээгдэхүүн хэрэглэх нь хангалттай амин дэм өгч чаддаггүй гэж боддог. Уг нь уламжлалт хоолны аргууд зөндөө байдаг. Жишээ нь цагаан идээ амин дэмээр баялаг гэдгийг хүн болгон мэддэг боловч нэг их хэрэглэдэггүй. Тийм болохоор бид хүн эцэг, эхчүүдэд зориулсан сургалт явуулья гэж бодож байгаа. 

-Тус эмнэлэг тэжээллэг хоол хүн­­сээс гадна ямар, ямар эмчилгээ хийдэг вэ?

-Манайх шарлага, утлага, давсан замын эмчилгээ, чийрэгжүүлэх дасгал, бүх биеийн иллэг массаж гээд тухайн хүүхдүүдэд хэрэгтэй бүхий л эмчилгээг хийдэг. Мөн зуны дулаанд усан эмчилгээ, элсэн дээр тоглуулах зэрэг эмчилгээ хийж байна.

-Танай клиникт ийм өвчин­тэй хүүхэд бүр хандаж болох уу, эмч сувилагч хэр хүрэлцээтэй байдаг вэ?

-Үгүй. Сонгинохайрхан дүүргийн хороодтой хамтарч ажилладаг болохоор тус дүүргийн өрхийн эмчийн хяналтад байгаа хүүхдүүдийг авдаг. Жилд 80 хүүхдэд эмчилгээ, асаргаа хийдэг. Манай сувиллын эрэлт их байдаг боловч анги, сувилагчдын хүрэлцээ харамсалтай нь бага байдаг. Дүүргээс сувиллыг өргөтгөхийг дэмжиж газар олгосон боловч хөрөнгө мөнгө дээр асуудалтай байна даа.