Улсын ерөнхий прокурорын УИХ-ын гишүүн Д.Дондогийн бү­рэн эрхийг түдгэлзүүлэх хүсэлтэд хариулах эрхтэй ганц субьект нь УИХ. Нэг ёсны хэн нэгэн гишүүн, аль нэг байнгын хорооны дарга бус УИХ асуудлыг албан ёсоор хэлэлцэж байж эцсийн шийдвэр гаргах ёстой гэсэн үг. Гэтэл УИХ-ын гишүүн, Хууль зүйн байнгын хорооны дарга Д.Одбаярын хувьд дээрх хуульд заасан дэг жаягийг огтхон ч   мэдэхгүй нэгэн бололтой. Мэдэхгүй ч гэж дээ, мэдэхийн дээдээр мэддэг ч мэдэн будилах нь өөрт нь сайхан санагдаад байгаа байж болох юм.

Учир нь, тэрбээр Улсын ерөнхий прокурорын хүсэлтэд өөрийн дураар “Бид энэ асуудлыг хэлэлцэх боломжгүй байна”, “Д.Дондог гишүүний эрхийг түдгэлзүүлэх үндэслэл байхгүй” гэх мэт хариу өгсөн. Түүний энэ үйлдэлд нь Улсын ерөнхий прокурорын газраас “Байнгын хорооны дарга УИХ-ын өмнөөс хариу өгөх үндэслэлгүй” хэмээн хууль зөрчиж буйг нь сануулсан ч Д.Одбаяр гишүүн  өөрийнхөө сайн дурын идэвхи зүтгэлээсээ татгалзсангүй.

Хэлдэг тайлбараа хэлж, ярь­саар л … Янз нь түүнд чуулганы завсарлагыг далимдуулан өөрийгөө УИХ-ын дарга мэт бодож, спикерийн зангараг гаргах нь сайхан санагдаад байгаа ч байж болох юм. Энэ итгэл зүтгэлийг нь үнэлээд түүнд сайн дурын “спикер” гэдэг алба олгоход буруудах зүйл үгүй л болов уу.