Зааны ясан эрэгийн шигшээ багийн ахлагч, дэлхийн шилдэг довтлогчдийн нэг Дидье Дрогба энэ зун багаа орхино гэх мэдээлэл хөгжөөн дэмжигчдийнх нь дунд сенсаац тариад байлаа. Харин тэрбээр өөрөө багаа орхих хүсэлгүй байгаагаа мэдэгдсэн байна. “Миний зүрх Челсигийн төлөө цохилдгийг бүгд мэдэх байх. Надад багаа орхих хүсэл байхгүй. Дараагийн улиралд ч би багтайгаа хамт тэмцэх болно. Би Челсид найм дахь улирлаа үдэх гэж байна. Энэ бол ямар ч довтлогчийн хувьд амар зүйл биш” хэмээн Дрогба ярьжээ.

Тэрбээр өнгөрсөн улиралд багийн номер нэг сонголт байгаагүй. Өндөр үнээр ирсэн Фернандо Торрес болон Анелька нартай гарааны төлөө өрсөлдөж байсан. Харин энэ улирлаас “Болтон”-д гайхалтай амжилт үзүүлсэн Старриж эргэн ирсэн. Энэ нь баг доторх өрсөлдөөнийг улам ширүүн болгож байгаа юм.

Дрогба энэ талаар хэлэхдээ "Миний хувьд энэ хүндрэлтэй зүйл биш. Өмнө нь дандаа л ийм байсан. Гуджонсен, Шевченко гээд надад үеийн үед өрсөлдөгчид байсан. Энэ нь ч багт сайнаар нөлөөлдөг. Хэрвээ би сайн бол намайг тоглуулна, муу байвал тоглуулахгүй. Энэ бол шударга өрсөлдөөн. Шинэ дасгалжуулагч маань сайн зохион байгуулна гэдэгт итгэлтэй байна" гэжээ.

Тэрбээр 2004 онд “Челси”-д “Марсель” багаас ирж байсан бөгөөд Лондонд өнгөрүүлэх түүний хугацаа дахин нэг жилээр нэмэгдэхээр болж байна.