Аймгийн Засаг даргын шуурхай зөвлөгөөнийг Тамгын газрын дарга Д.Соёлчхүү удирдан явууллаа. Тэрээр шуурхай зөвлөгөөний үеэр хэлтэс, албадын удирдлагуудад хэд хэдэн чиглэлийн үүрэг даалгавар өглөө. Тодруулбал, Оны сүүлч болж байгаа тул энэ сарын 26 гэхэд төсөв, санхүүгийн гүйлгээ зогсоно гэдгийг Сангийн Яамнаас мэдэгдсэн.

Тиймээс дээрх хугацаанаас урьтаж төрийн байгууллагууд өр, авлагын асуудлаа цэгцлэх үүргийг өглөө. Манай аймагтай зэргэлдээ орших аймаг, сумдад хонь, ямааны цэцэг өвчин гарсан. Хэрэв энэ өвчин манай аймагт гарвал хүн амын хувьд олон талын эрсдэлтэйг аймгийн Засаг даргын Тамгын газрын дарга Д.Соёлчхүү анхаарууллаа. Тиймээс өвчний тохиолдол бүртгэгдсэн газраас өөрийн аймгийн нутаг дэвсгэр рүү малын мах оруулахгүй байх асуудалд холбогдох байгууллагууд хамтран анхаарлаа хандуулахыг үүрэгдлээ. Мөн мал тооллогын нэгдсэн дүнг гаргаж, Баян-Өндөр, Жаргалант сум өвөлжилтийн байдлын талаарх мэдээллийг танилцуулах хэрэгтэйг хэллээ. Ингэхдээ нэн яаралтай авах шаардлагатай арга хэмжээний жагсаалтыг гаргах чиглэлийг өгсөн юм.

Түүнээс гадна байгууллага, аж ахуйн нэгжүүд шинэ жилийн баяраа тэмдэглэж эхлэх гэж буй энэ үед АЗДТГ-ын Хууль эрх зүйн хэлтэс, Цагдаагийн газар, Баян-Өндөр, Жаргалант сумын Засаг дарга нар, багийн Засаг даргын ажлын албад хамтран хариуцлагатай жижүүрийн хуваарь гаргаж мөрдүүлэх хэрэгтэйг хэллээ. Энэ нь баяр ёслолын үйл ажиллагааны дараа иргэд гэмтэж, бэртэх эрсдэлээс урьдчилан сэргийлэх ач холбогдолтойг онцолсон юм. Түүнээс гадна үйлчилгээний газрууд согтууруулах ундаа хэтрүүлэн хэрэглэсэн хүмүүст үйлчлэхгүй, цагийн хуваариа мөрдөж хүлээсэн үүргээ биелүүлэх шаардлагатайг сануулсан юм.

Эх сурвалж: erdenetinfo.mn