Ардчилсан нам /АН/-ынхан даргаа сонгох их сунгаанд хүч сорьж байна. Их хурлаа зарлан хуралдуулж, даргаа ирэх 2017 оны нэгдүгээр сард сонгоно гэдгээ ил тод зарласнаас хойш намын даргын сунгаанд хүч үзэх хүмүүс илүү идэвхтэй болжээ. Тэд бүртгүүлж эхлээд байгаа бөгөөд УИХ-ын гишүүн Ж.Батзандан "АН-ын даргад нэр дэвших бол урьдчилж 250 саяыг тушаах юм байна. Зардлын 10 хувь" хэмээн жиргэсэн нь олны анхааралд өртөөд байна. Тэрбээр энэхүү зардлыг АН-ын даргад өрсөлдөх хүмүүс мөрийн хөтөлбөрөө 21 аймаг, есөн дүүргийн гишүүд дэмжигчдэдээ очиж танилцуулахад гарах зардал гэж тодотгосон бөгөөд “Нэр дэвшигчид хувааж гаргана гэж байсан ч ийм босго тавьсан” гэж мэдэгдсэн.