Сайд Л.Гансүхийн гомдлоор үүссэн, сэтгүүлч Г.Уянга, түүний нөхөр А.Баатархуяг нартай холбоотой хэрэг сүүлийн хэдэн сар дуулиан тарьж байна. Эрүүгийн хуульд хүн гүтгэхийг гэмт хэрэг гэж заасан, тэр тусмаа олон нийтийн мэдээллийн хэрэгслээр тараасан бол хүндрэхээр зохицуулсан тул дээрх сэтгүүлчдийг багаар бодоход торгуулах, ихээр бол баривчлах шийтгэл хүлээж байгаа.
Сайд өөрийнхөө буруугүйг нотолсон нэвтрүүлэг хийж цацлаа, түүнийг гэм буруугүй байжээ гэдгийг олон нийт ч хангалттай ойлголоо. Гэтэл эхнэр нөхөр сэтгүүлчдийг заавал шийтгэх нь ямар ач холбогдолтой юм бэ гэсэн асуулт гарч ирнэ. Нөгөө талаар сайд өөрөө маргаан үүсгэж олны анхаарлыг татаагүй бол өнөөх сая долларын хаус энээ тэрээг нь хүмүүс мэдэхгүй л өнгөрөх байсан байх. Харин одоо бол хэдэн жилийн дараа ч гэсэн “нөгөө Гансүх байна шүү дээ, тэгж гэнэ хө” гэж ярихад өөдөөс нь “Ямар Гансүх билээ?” гэж асуухад “Яагаав, нөгөө сая долларын хаусны дуулианд ордог” гэж ярихаар болчихож. Тэгэхлээр цагдаад гомдол гаргаснаараа сайд маань хожсон уу, хохирсон уу гэдэг нь бас л эргэлзээтэй асуудал. Энэ эргэлзээнээс шалтгаалан маш олон сэтгүүлч шүүх, цагдаагийн хаалга татахаас аврагдсан даа.
Хүнийг гүтгэсэн, түүний талаар худал мэдээлэл тараасан бол хуулийн дагуу шийдвэрлэгдэх хоёр зам бий. Нэг бол иргэний журмаар шүүхэд хандаж нэр төрөө сэргээлгэнэ, эс бөгөөс цагдаад хандаж гүтгэсэн этгээдэд эрүүгийн хариуцлага хүлээлгэнэ. Эрүүгийн хуульд “эрүүгийн хариуцлага гарцаагүй байх зарчим” гэж бий. Энэ нь энгийнээр бол гэмт хэрэг үйлдсэн л бол заавал шийтгэнэ гэсэн агуулгатай. Гэтэл хүний нэр төртэй холбоотой асуудал болоод ирэхээрээ цагдаад хандвал шийтгэнэ, шүүхэд хандсан бол тэрүүгээрээ бол гэдэг нь дээрх зарчимд харшилж буй хэрэг мөн. Тийм болохоор эрүүгийн хуулиас тэр зүйл ангийг зүгээр л хасчих хэрэгтэй байгаа юм даа, миний бодлоор.
Эрүүгийн хуулиас хасчихлаар маргаашнаас нь эхлээд л сэтгүүлчид УИХ-ын гишүүдийг бүгдийг нь, урлаг соёлынхонтой хамтад нь гүтгээд эхэлнэ гэсэн сөрөг ойлголт бий. Гэтэл тэрхүү хэвлэл мэдээллийн хэрэгслээс, сэтгүүлчээс нь гэм хороо гаргуулах, мөнгөн хариуцлага хүлээлгэх эрх хуулиараа нээлттэй байгаа шүү дээ.
Олон нийтийн мэдээллийн хэрэгсэл өөрөө бодитой, тэнцвэртэй мэдээлэл хүргэх нь эрүүгийн хуулийн ганцхан тэр заалтаас шалтгаалахгүй. Үнэхээр хариуцлага ярих гэж байгаа бол зохицуулж буй хуулиудад нь нэмэлт өөрчлөлт оруулж болно. Бусдын талаар үндэслэлгүй мэдээлэл тараасан нь удаа дараа шүүхээр тогтоогдвол мэдээллийн хэрэгслийг татан буулгадаг, эрхийг нь хасдаг тодорхой зохицуулалтууд ч байж болохыг үгүйсгэхгүй. Үүнээс гадна хамгийн чухал зүйл нь мэргэжлийн өөрөө удирдах байгууллагынх нь төлөвшлийн асуудал шийдвэрлэгдэх. Үүнийг сэтгүүлчид өөрсдөө хийнэ, гэхдээ эрх зүйн үндсийг нь төр тавьж өгөхөөс аргагүй. Алдаа дутагдал, ёс зүйгүй байдал зэргээсээ шалтгаалан “сэтгүүлч” хэмээх эрхэм нэрийг ашиглах, тэрхүү нэрээр дуудуулах эрхгүй болдог бол энэ салбарт ажилладаг хэн бүхэн л хариуцлагатай байхыг хичээх бизээ.
Нэр төр гэдэг өөрөө хийсвэр ойлголт тул түүний үнэлгээ бас харьцангуй л байна. Нэг хэсэг нэр төрөө сэргээлгэхээр шүүхэд хандагсдын гомдлыг 500 мянган төгрөгөөр тооцож барагдуулах нь жишиг болчихоод байсан бол өнөөдөр харьцангуй өссөн ч гэсэн дээд тал нь таван сая төгрөг гаргуулахаар шийдвэрлэгдлээ гэж дуулдсан. Томоохон бизнес эрхлэгчийн хувьд ажил хэргийн нэр хүндээ алдвал хэдэн зуун саяар нь алдагдал хүлээнэ, гэтэл тэрхүү алдагдалд хүргэсэн этгээд хэдхээн төгрөг төлж барагдуулна гэвэл дэндүү шударга бус. Тиймээс шүүгчид ч бас энэ тал дээр анхаарах шаардлагатай байгаа юм.
Бусдыг харлуулах, гүтгэх нь монголчуудын хувьд арай хэтэрлээ. Дуучин Болдыг насанд хүрээгүй хүүхэд садар самуунд уруу татлаа гэж, Ерөнхийлөгч Ц.Элбэгдоржийг солонгосчуудаас мөнгө авлаа гэж, Б.Наранзунг “Цогт тайж” киног зарлаа гэж, тэр ч байтугай жанжин Д.Сүхбаатарыг хүртэл хэн ч биш байсан гэж гүтгэлээ. Үнэний мөр цагаан тул учир нь олдож л байна. Гэтэл цаана нь гүтгүүлчихээд чимээгүй тэсээд өнгөрсөн хичнээн олон эмтэрсэн зүрх, халирсан итгэл байгаа гэж санана. Эх орондоо ихийг хийж бүтээх мөн ч олон элэг нэгтнээ монголчууд бид цуу яриа, гүжир ховоор гомдоосон доо.
Энэ муухай хандлагыг таслан зогсоох, үгүйдээ л багасгах гол арга зам бол нэр төрийн хамгаалалт, түүний зохицуулалтыг хууль зүйн хувьд боловсронгуй болгох явдал юм. Тэгэхдээ юм л бол өнөөх “эрүүгийн хуульд нэмэлт зүйл оруулна” гэдэг “хоцрогдсон” хандлагаар биш иргэний хууль, хэвлэл мэдээллийн хэрэгслүүдтэй холбоотой хууль, журмуудад хэдэн чухал нэмэлт, өөрчлөлтүүд хийгээд, үүний дараа сэтгүүлчийг ажлаа хийснийх нь төлөө шоронд хийдэг явдал үгүй болчихвол хаа хаанаа сэтгэл өег байхсан даа.