Италийн алдарт “АС Милан” багийн тоглогч асан Франко Барези Монголын хүүхэд залууст хөлбөмбөгийн техник, арга барилаасаа хуваалцах зорилгоор ирсэн талаар өнөөдөр мэдээлэл хийлээ. Тэрбээр Улаанбаатар хотын захирагч бөгөөд нийслэлийн Засаг дарга Г.Мөнхбаярын санаачилсан “Милан клубын өсвөрийн зуслан Улаанбаатар 2011” төсөл хөтөлбөрийн хүрээнд урилгаар манай оронд  ирээд байгаа юм.  Франко Барези нь “Милан” клубын дасгалжуулагчдын хамтаар ирсэн бөгөөд манай улсын нийт 200 орчим хүүхэд, залууст өөрсдийн техник, арга барил, талбай дээр биеэ авч явах талаар сургалт зохион байгуулахаар төлөвлөөд байгаа гэнэ. Тус сургалтын хүрээнд шалгарсан хүүхдүүд Италид ирэх аравдугаар сард болох “Дэлхийн хүүхдийн хөлбөмбөгийн тэмцээн”-д оролцох эрхийн эзэд болох юм.

Олон орны залуус хөлбөмбөгөөр хичээллэдэг боловч дэлхий тавцанд гарах боломж тэр бүр олддоггүй. Иймд төслийг санаачлагчид “Энэ арга хэмжээний хүрээнд Монголын хүүхэд, залууст дэлхийн давцанд гарах боломжийг нээн өгч байгаагаар онцлогтой”  гэж байлаа.  Мөн Монголын хөлбөмбөгийн хорооноос ирээдүйн 200 хөлбөмбөгчид “АС Милан” багийн өмсгөлийг өнөөдөр гардууллаа. Харин маргаашнаас эхлэн ерөнхий боловсролын тавдугаар сургууль мөн 96 дугаар сургууль, 97 дугаар сургууль дээр баасан гариг хүртэл сургалт зохион байгуулж, бямба гаригт хүүхдүүдийн хооронд нөхөрсөг тоглолт зохион байгуулах юм. Тус тоглолтын үеэр гурван хүүхдийг шалгаруулж, “АС Милан”-ы тоглогчид, дасгалжуулагчид, мөн Франко Барези нарын хамт Монголын хөлбөмбөгийн шигшээ багтай нөхөрсөг тоглолт хийх гэнэ. Мөн өнөөдөр 19.00 цагаас С1 телевизээр фанатуудын уулзалт зохион байгуулахаар төлөвлөөд буй ажээ.