УИХ-ын хаврын чуулганаар Хөдөө аж ахуйн гаралтай бараа, түүхий эдийн биржийн тухай хуулийг баталсан. Энэ хуулийн төсөл өмнө нь олон удаа буцаж байж сая батлагджээ. Нүүдлийн соёл иргэшилтэй, жалгын нэг тарсан малчдад нэгдсэн журмаар үйлчилж хөдөө аж ахуйн түүхий эдийг нь авах бололцоо биржтэй болсноор бүрдэх юм байна. Ийм хуультай болсноор хөдөө аж ахуйн гаралтай бараа, түүхий эдийн биржийг үүсгэн байгуулах, зохион байгуулах, үйл ажиллагааны эрх зүйн үндсийг тогтоох , бараа, түүхий эдийг бэлтгэх, нийлүүлэх, хадгалах тээвэрлэх, биржээр арилжихтай холбогдож үүсэх харилцааг зохицуулах боломжтой болж буйг УИХ-ын Байгаль орчин, хүнс, хөдөө аж ахуйн байнгын хорооны дарга П.Алтангэрэл танилцууллаа.
Малчид, тариаланчид өөрсдийн үйлдвэрлэсэн хөдөө аж ахуйн гаралтай бараа, түүхий эдийг хоршоо болон брокероор дамжуулан биржийн зах зээлд худалдаалахаар зохицуулалт хийх эрх зүйн боломж бүрдсэн байна. Цоо шинэ салбар тул боловсон хүчин бэлтгэхээс эхлээд ажил их. Иймд уг хуулийг батлагдсан өдрөөс хойш нэг жилийн дараа буюу 2012 оны зургадугаар сарын 1-нээс хэрэгжүүлэхээр болжээ. Энэ нь хөдөө аж ахуйн салбөарт хийж буй нэг том алхам гэдгийг П.Алтангэрэл гишүүн онцоллоо.
“Монгол мал” хөтөлбөрийн шугамаар тодорхой ажлууд мөн хийжээ. Тэмээ, хонины ноосонд урамшуулал олгох, үр тариа, мах, сүүний чиглэлээр ч арга хэмжээ авсан байна. Одоо арьс ширний чиглэлээр асуудал боловсруулах үлдээд байгаа аж.
Дээрх хуулийг баталсантай холбогдуулан Худалдаа, аж үйлдвэрийн танхимын тухай хуульд нэмэлт оруулах тухай хуулийг мөн УИХ баталжээ. Уг хуулиар экспортод гаргаж байгаа бараа, түүхий эдийн гарал үүслийг хөдөө аж ахуйн бараа, түүхий эдийн биржийн тодорхойлолтод үндэслэн гэрчлэхээр хуульчилжээ.