Нийслэлийн хэмжээний их цэвэрлэгээ маргаашаас эхэлнэ. Цэвэрлэгээний дүнг урьд нь хэд хичнээн их оролцож, хэдий хэмжээний хог ачсан төдийгөөр дүгнэдэг байсан бол энэ удаагийн цэвэрлэгээг гэрэл зургаар баримтжуулна гэж хотын ерөнхий менежер анхааруулсан. Дөрөв хоног үргэлжлэх их  цэвэрлэгээнд томоохон худалдааны төв, хүнс, барааны захыг түр хугацаагаар хааж байгаад оролцуулахыг хотын дарга сануулсан. Тиймээс бид аль зах, хэзээ, хэдэн цагаар хаах талаар тодруулж, уншигчдадаа хүргэхийг хүссэн боловч тоймтой хариу авч чадсангүй.

Захирагчийн ажлын албаны орчны бохирдол хог хаягдлын менежментийн хэлтсийн ахлах мэргэжилтэн С.Аригуун:

-Одоогоор манай байгууллагаас хуваарь гаргаагүй байна. Дүүргүүдийн дарга нар үүнийг зохицуулах учиртай.Их цэвэрлэгээг өргөн хүрээтэй зохион байгуулж байгаа болохоор худалдааны төвүүдийг түр хугацаагаар хааж, хүмүүсийг нь орчноо цэвэрлэхэд дайчлах нь зөв л дөө.

Баянзүрх дүүргийн Засаг дарга Б.Батзориг:

-Манай дүүргийн нутаг дэвсгэр дээр Нарантуул, Баянзүрх зах, Шинэ өглөө, Норжин зэрэг томоохон худалдааны төвүүд байдаг. Эдгээрийн хаах хуваарь гараагүй. Хүмүүс нь ажлаа зохицуулаад их цэвэрлэгээнд оролцох боломжтой гэж үзэж байгаа гэлээ.

Одоогийн байдлаар худалдааны төв, хүнс барааны  захуудын хувьд их цэвэрлэгээний хуваарь гараагүй байгаа болохоор энэ удаагийн цэвэрлэгээг илүү өргөн хүрээнд зохион байгуулна гэсэн хотын удирдлагуудын шийдвэр цаасан дээрээ л үлдэх нь бололтой.

Д.Цээнэ