Афганистаны нийслэл Кабул хотод хууль бусаар борлуулж байсан их хэмжээний согтууруулах ундааг энэ долоо хоногт устгалд оруулжээ. Афганистаны нийслэл орчимд хууль бусаар борлуулж байсан согтууруулах ундаануудыг сүүлийн хоёр жилийн хугацаанд хурааж, нэгдсэн устгалд оруулж байгаа талаар тус хотын цагдаагийн газрын мөрдөн байцаах хэлтсийн дарга ахмад Мохаммад Захир мэдэгдсэн байна.

Согтууруулах ундааг хураах ажлыг Афганистаны гаалийн ажилчид хариуцаж хийсэн бөгөөд  Кабул хотын шүүхийн шийдвэрийн дагуу лхагва гаригт устгасан байна. Афганистаны ихэнх хэсэгт согтууруулах ундааг худалдахыг хориглодог ба тус улсын хүн амын 99 хувийг бүрдүүлдэг лалынхны хувьд согтууруулах ундааг борлуулах, хэрэглэх зэрэг нь гэмт хэрэгт тооцогддог ажээ. Зөвхөн гадаадын иргэдэд үйлчилдэг цөөн хэдэн газарт согтууруулах ундаа худалдаалахыг зөвшөөрдөг байна.