Маргааш буюу дөрөвдүгээр сарын 21-ний лхагва гаригт УИХ-ын Хүний эрхийн дэд хорооноос долдугаар сарын 1-ний хэргийн талаар нээлттэй сонсгол хийхээр зарлаж, энэ долоо хоногт УИХ-аар хэлэлцэх асуудлын жагсаалтад оруулаад байсан билээ. Гэвч УИХ-ын дарга Д.Дэмбэрэл өнөөдөр сонсголыг хойшлуулжээ. Хойшлуулсан шалтгаанаа “Улсын ерөнхий прокурор оролцохоос татгалзсан учраас” хэмээн тайлбарласан байна.  Энэ удаагийн Хүний эрхийн дэд хорооны нээлттэй сонсголыг долдугаар сарын 1-ний үйл явдлын үеэр хуулийн байгууллагууд хэрхэн ажилласан талаар хийх ёстой байсан. Ялангуяа онц байдлын үеэр галт зэвсэг хэрэглэсэн нь хууль зөрчсөн эсэх тухай асуудлыг тухайн үед Хууль зүй, дотоод хэргийн сайдаар ажиллаж байсан Ц.Мөнх-Оргил, Цагдаагийн ерөнхий газрын дарга асан Ч.Амарболд нарыг байлцуулан хэлэлцэх ёстой байлаа. 
  
Б.ЗАЯА