Монгол Улсын Засгийн Газар 2011 оныг хөдөлмөр эрхлэлтийг дэмжих жил болгон зарласантай холбоотойгоор Нийгэм хамгаалал хөдөлмөрийн яам, Хөдөлмөр халамж үйлчилгээний газраас олон хөтөлбөр туршиж  байгаагийн нэг нь “Иргэд хүнсний ногоо тариалах, өрхийн үйлдвэрлэл бий болгоход дэмжих хөтөлбөр”.  Уг хөтөлбөр нь нийслэлийн хэмжээн дэх зургаан дүүргийн ажилгүй иргэдийн амжиргааг дээшлүүлэх, өрхийн үйлдвэрлэл бий болгох зорилгоор Хөдөлмөр халамж үйлчилгээний газрын Халамж үйлчилгээний сангаас 577 сая төгрөг төсөвлөжээ. Эхний ээлжинд тус сангаас 250 сая төгрөг олгосон бөгөөд Нийслэлийн Засаг даргын Тамгын газраас 400 га талбайд төмс, хүнсний ногооны тариалахад зориулж үнэ төлбөргүйгээр газар олгож, төмс хүнсний ногооны үр, үрслэгээгээр хангажээ. Одоогоор тариалалт эхэлсэн бөгөөд 800 иргэн дотроо 40 бүлэг болж , бүлэг тус бүр 20 хүнтэй нэг га талбайд төмс тариалж байгаа аж. Өчигдөр Тарвагатайн аманд байрлах тус тариалангийн явцтай нийслэлийн Засаг даргын орлогч Ц.Цогзолмаа, нийслэлийн Хөдөлмөрийн газрын дарга Б.Батсайхан болон холбогдох хүмүүс газар дээр нь очиж танилцлаа. Дээрх удирдлагууд уг газарт хөдөлмөр эрхэлж буй иргэдийн ажиллах нөхцөл, ажлын явцтай танилцаж, цаашид анхаарах ёстой асуудлыг нэг бүрчлэн тодруулах зорилготой байв. Уг газарт нэг өдөр долоон бүлгийн 140 хүн ирж ажилладаг бөгөөд хөтөлбөрийн хүрээнд тарих үр, газрыг нь үнэ төлбөргүй олгож, усалгааны таван худаг хийж, талбайг тойруулан хашаа барин ажиллах нөхцөлийг бүрэн хангаж өгсөн нь энэ үеэр анзаарагдаж байлаа. Тус хөтөлбөрийн хүрээнд хөдөлмөр эрхэлж буй Сүхбаатар дүүргийн харьяат, “Эв нэгдэл” бүлгийн гишүүн С.Баасанбаяраас ажил хөдөлмөрийнх нь үр шимийн талаар товч сонирхлоо.

 -Энд ихэвчлэн гэр бүлээрээ ажиллаж байх шиг.  Таны хувьд?    
                                                       
-Харьяа дүүрэг, хорооны ажилтнууд ажилгүй иргэдийг ажлын байраар хангах хөтөлбөр хэрэгжиж байна гэх мэдээллийн дагуу энэ хавраас ажлын байртай болсондоо их баяртай байгаа. Би эгчтэйгээ хамт ажиллаж байгаа. Цэвэр агаарт, гэрэл цахилгаантай, өдөр бүр унаагаар үнэгүй хүргэж  өгөөд ажиллах бүх нөхцлөөр хангаж байгаа.

-Үр дүн нь гарах хараахан болоогүй боловч хөтөлбөрт хамрагдаж буйдаа сэтгэл хэр ханамжтай байгаа вэ?     
                                                                                                                
-Бид хоёрын хувьд тодорхой хэмжээгээр амьдралд минь нөлөөлж чадах үр өгөөжтэй хөтөлбөрт хамрагдсан гэдэгтээ сэтгэл хангалуун байгаа. Одоо бол хэр ургац авч ашигтай байх нь зөвхөн бидний ажлаас шалтгаална үр дүнг нь сайн гарах болно гэдэг үүднээс өдрийн халууныг умартан, хичээл зүтгэл гарган ажиллаж байна. Итгэж найдаад энэ ажлыг бидэнд хариуцуулж байхад би муу ажиллах ёсгүй л гэж бодож байгаа.                   
                                                                       
-Тариалсан төмс хэр ургаж байна?          
                                                                   
-Маш сайн байгаа. Тэнгэр хураа хайрлаад услах шаардлага ч алга. Бид зөвхөн зэрлэгээ түүгээд, манаад л байж байна. Нутгын иргэд машинтай ирээд хулгайгаар ачаад явчихдаг гэсэн болохоор найман сараас ээлжээр шөнө харж байхаар болсон.
Ийнхүү хэсэг хүмүүсийг хийх ажил, идэх хоолтой нь залгуулах гэсэн ажлын үр дүн амжилттай байгаад ажлын хэсгийг удирдаж буй нийслэлийн Засаг даргын орлогч Ц.Цогзолмаа тун сэтгэл ханамжтай буцлаа. Тариаланч иргэдийн тав тухыг хангах, хадгалалт хамгаалалтын асуудалд анхаарах хэрэгтэй байгааг цаашид ажил хэрэг болгоно гэдгээ ч энэ үеэр амаллаа. Ургац хэр арвин байна түүнийхээ хэрээр хөдөлмөрийн амт шимтийг мэдрэх, ирэх жил дахин тариалах, цаашид төмс, хүнсний ногоо даршлах бага оврын үйлдвэрлэл эрхлэх, худалдаа борлуулалт нэмэгдүүлэх гээд өөдрөг үзлээр омогшсон 800 тариаланчдаа амжилт хүсье. Загасны мах өгөхөөс загас барих аргыг нь зааж өг гэдэг дээ.