Нийслэлчүүдэд амарч зугаалах, тохижилт бүхий  гудамж талбай хомс. Хотын төвд барилга байшин хаа сайгүй олноороо баригдаж байгаа ч иргэдийн амралт зугаалах талбайг орхигдуулсаар өнөөдрийг хүрсэн юм. Харин Сүхбаатар дүүргийнхэн энэ жил Б.Цэрэндоржийн гудамжийг иж бүрэн тохижуулжээ. Усан оргилуурын хажууд, цэвэр цэмцгэр орчинд тухлахыг хүссэн иргэд орой бүр  энэ  гудамжинд олноороо цугларах болсон байна. Тус гудамжны нийтийн эзэмшлийн 4000 м2 явган зам талбайг байгалийн чулуугаар шинэчилж, хуучин усан оргилуурын оронд 7.5х26 хэмжээтэй аялгуут усан оргилуур хийжээ. Мөн сандал, хогийн сав байрлуулж, 2500 м2 ногоон байгууламжийн зүлэгт талбайг шинэчлэн, 36 ширхэг гэрэлтүүлгийг шинээр хийж, Битлзийн хөшөөний хэсгийг сэргээж,  гудамжны хоёр талын авто замыг засварлаад байна.

Уг талбайг түүх дурсгалын, залуучуудын, хосын хэсэн гэсэн  гурван  бүсэд хувааж, хүмүүсийн хөдөлгөөнийг   чөлөөтэй байлгах үүднээс  хойноосоо урагшаа чиглэсэн орц гарцтай болгожээ  Түүх дурсгалын хэсэгт үндэсний бахархал  болох гурван метр өндөр морин хуур, Ардын засгийн зургаад дахь Ерөнхий сайд Б.Цэрэндоржийн хөшөөг сэргээн засварлаж,  хоёр  талаар нь иж бүрэн гэрэлтүүлэг болон ургамлан хашлага, бут сөөг тарихаар  төлөвлөсөн байна. Залуучуудын бүсэд хүүхэд залуус роликоор гулгаж, дугуй унах талбай,  хөгжмийн хэмнэлээр оргилох  усан оргилуур хийсэн нь олны сонирхлыг татаж байлаа.  Мөн задгай талбайн бага хэмжээний шоу урлагийн арга хэмжээ зохион байгуулах боломжийг бүрдүүлжээ. Дараагийн шатанд гудамжны хоёр талын явган хүний  замыг шинэчлэх, 3.6 м өндөртэй морин хуурийг хүрлээр хийж түүх дурсгалын хэсэгт байрлуулах бол орц гарцын хэсэгт чулуун багана хийх гэнэ. Гудамжны хоёр  талын барилгын фасадыг LED гэрлэн чимэглэлээр хийснээр тус гудамжны тохижилтын ажил бүрэн дуусах юм байна. Өнгөрөгч тавдугаар сараас эхэлсэн тохижилтын ажлын эхний ээлжийг хугацаанаас арав гаруй хоногийн өмнө хүлээлгэн өгсөн бол дараагийн  шатны ажлыг ирэх аравдугаар сард бүрэн дуусгахаар төлөвлөжээ. Энэхүү ажлыг хийхэд улсын төсвөөс 500 сая төгрөг зарцуулж, нэмэлт 70 гаруй сая төгрөгийг гарган нийт 600 орчим сая төгрөгөөр гүйцэтгэсэн байна.