Энэтхэг улсын анхны эмэгтэй Ерөнхийлөгч бол Пратибха Деви­сингх Патил. Тэрбээр 2007 оны долоодугаар сарын 25-нд Ерөн­хий­лөгчөөр сонгогдож байв. Гэхдээ өр­сөлдөгчөөсөө 300 мянга гаруй санал илүү авч байсан нь Ерөнхийлөгчөөр ажиллах эрхийг нь нээж өгсөн юм. Түүний имижийг “Ядуу, өрх толгойлсон эмэгтэйчүүдийг дэм­жигч” хэмээн тодорхойлж болно. Түүнчлэн эмэгтэй улстөрч бүрт заяагаад байхгүй тийм л энэрэнгүй зантай ч гэж хэлж болох гэнэ. Үүгээр ч зогсохгүй эмэгтэйчүүдийг үл тоомсорлодог Энэтхэг улсад эмэгтэйчүүдийн үнэ цэнийг мэд­рүүлж чадсан. Нэг үгээр хэлбэл Энэт­хэг эмэгтэйчүүдийн бэлгэ тэмдэг гэж ч болно. Хуулийн сургуульд су­ралцсаныхаа дараа нийгмийг соён гэгээрүүлэх арга хэмжээнд гар бие оролцож байсан нь Пратибха Девисингх Патилыг ямар хүн болохыг нь илтгэдэг гэдэг. Тэрбээр 1967 онд Ерөнхий сайдын орлогчоор сонгогдон ажилласан тэр үеэс эхлэн улс төртэй салшгүй холбогдсон нэгэн. Анхны гэх тодотголын эзэн болсон тэрбээр 1985, 1990, 1991 онд Энэтхэг улсын Парламентын гишүүнээр ажиллаж байсан. Түүнчлэн Энэтхэгийн үндэс­­ний конгресс намын гишүүн. Ийнхүү Энэтхэгийн анхны эмэгтэй Ерөнхийлөгч манай улсад энэ сарын 27-30-нд албан ёсны айлчлал хийх гэж байна. Энэхүү айлчлалын зорилго нь хоёр орны найрамдалт харилцаа, хамтын ажиллагааг хөгжүүлэх, бо­ловсрол болон оюутны солилцоог эрчимжүүлэхэд илүү анхаарах явдал аж. Тэрбээр айлчлалынхаа үеэр Ерөн­хийлөгч Ц.Элбэгдорж, Ерөнхий сайд С.Батболд болон Засгийн газрын гишүүдтэй уулзах юм.