Авлигатай тэмцэх газраас төрийн өндөр болон бусад албан тушаалтнуудын ХӨРӨНГӨ, ОРЛОГЫН МЭДҮҮЛЭГ /ХОМ/-ийг тоймлон гаргасан байна.  ХОМ-ийн хураангуйд сонгогдоод удаагүй байгаа  УИХ-ын дөрвөн гишүүн байргүй гэдгээ дурджээ. 

ЭХЛЭЭД ОРОН СУУЦГҮЙ УИХ-ЫН ГИШҮҮДИЙГ  ТАНИЛЦУУЛЪЯ

УИХ-ын гишүүн М.БИЛЭГТ. Тэрбээр 2016 оны УИХ-ын ээлжит сонгуулиар Баянхонгор аймгаас нэр дэвшиж, сонгогдсон. Түүнийг III, IV хороололд байрлах “Билэг” их дэлгүүрийн эзэн гэдгээр нь хүмүүс таньдаг байсан. Тэрбээр АТГ-т өгсөн ХОМ-тээ орон сууцгүй ч, 7 тэрбум 500 сая төгрөгөөр үнэлэгдэх байгууламжтай гэж мэдүүлжээ.  Харин М.Билэгт гишүүний:

• Нийт орлого 10 сая 800 мянган төгрөг           
• 230 сая төгрөгөөр үнэлэгдэх Lexus-570 маркийн хоёр автомашинтай          
• Малгүй        
• Дөрвөн тэрбум 210 сая төгрөгөөр үнэлэгдэх  1684 мкв-т газартай        
• 23 сая төгрөгийн хадгаламжтай        
• Арилжааны банкинд ямар нэгэн зээлгүй        
• “Ачлал групп”, “Ачлал трейд”, “Ачлал-эхлэл”, “Ачлалжаргалан”, “Ачлал-Оранж”, “Монлаа” гэсэн зургаан компанийг эзэмшдэг, хөрөнгө оруулагч нь юм байна.        

УИХ-ын гишүүн Д.ГАНТУЛГА. УИХ-ын 2016 оны ээлжит сонгуульд Хэнтий аймгаас нэр дэвшиж, сонгогдсон тэрбээр байргүй гэж ХОМ-ээ өгчээ. Түүний нийт орлогын хэмжээ 16 сая 370 мянга бол гэр бүлийн орлого нь 14 сая 836 мянган төгрөг юм. Түүнд:

• Мал, машин, орон сууцгүй   
• 100 сая төгрөгөөр үнэлэгдэх  үнэт эдлэлтэй        
• Нэг сая 623 мянган төгрөгийн хадгаламжтай      
• Авлага, зээл аль нь ч байхгүй        
• “Эрдэнэс Тавантолгой”-н ХК-ийн 3216 ширхэг хувьцаа  эзэмшдэг.

УИХ-ын гишүүн Ц.МӨНХ-ОРГИЛ. УИХ-ын сонгуулийн 60 тойрогт нэр дэвшиж, ялалт байгуулсан тэрбээр Гадаад харилцааны сайдаар томилогдож, давхар дээл өмссөн гишүүдийн нэг болсон. ХОМ-тээ орон сууцгүй, өрхийн нийт орлого нэг тэрбум 802 сая 294 мянга гэж мэдүүлжээ.

• Range Rover, Lexus-570 маркийн 220 сая төгрөгөөр үнэлэгдэх хоёр машинтай
• Малгүй, газаргүй         
• 299 сая 581.4 мянган төгрөгийн хадгаламжтай        
• М-Си-Эс-Холдингд 18 тэрбум 851 сая 851.4 мянган төгрөгийн зээлтэй        
• “Өлзийт төв”, “М-Си-Эс-Монголиа Лимитед”, “ГОЁО”, “Гера Инвестмен Лимитед”, “Тандер Болт” компаниудад хувьцаа эзэмшдэг.

УИХ-ын гишүүн А.СҮХБАТ.  УИХ-ын сонгуулийн 29 дүгээр тойргоос сонгогдсон тэрбээр орон сууцгүй ч 9 тэрбум 200 сая төгрөгөөр үнэлэгдэх үйлдвэр, үйлчилгээний зориулалтын хоёр барилгатай гэжээ. Түүний нийт орлого нь 143 сая 200 мянга. Тэрбээр,

• Land cruiser-105,200,  Нuyndai Mighty, Santa fe гэсэн 205 сая төгрөгийн дөрвөн автомашинтай
• 64 адуу, 78 үхэр, 30 тахиа, бусад-3 буюу 106 сая 600 мянган төгрөгтэй тэнцэх мал, аж ахуйтай        
• Эзэмшил газаргүй        
• Хоёр тэрбум 200 сая төгрөгөөр үнэлэгдэх үнэт эдлэлтэй        
• 24 сая 998 мянган төгрөгийн хадгаламжтай        
• 548 сая 765.3 мянган төгрөгийн авлагатай        
• Зээлгүй        
• “Алтан хүнс групп”, “Ээлт хан”, “Даяар Монгол интернейшнл”, “Булган хунтайж групп”, “Креатив Монгол солюшн групп”, “Сэлэнгэ мах”, “Тэрх оргил дрийпинг” компаниудын хувьцаа эзэмшдэг.

Д.УЛАМБАЯР