Монгол Улсын Шинжлэх ухааны Академи /ШУА/-ийн ээлжит их чуулган өнгөрсөн долоо хоногт болж, ШУА-ийн ерөнхийлөгчөөр академич Д.Рэгдэлийг сонгожээ. Тэрбээр тус академийн тэргүүн дэд ерөнхийлөгчөөр ажиллаж байсан юм.

Академич Д.Рэгдэл нь 1951 онд Говь-Алтай аймгийн Бигэр суманд төрсөн, 1976 онд ЗХУ-ын Харьковын их сургуулийг биохимич мэргэжлээр төгсөж, 1985 онд Берлиний Гумболдтын их сургуульд доктор (Ph.D), 2001 онд “Липоксигеназууд, нийтлэг шинж, өвөрмөц онцлог” сэдвээр химийн шинжлэх ухааны доктор (Sc.D)-ын зэрэг тус тус хамгаалсан байна.

Тэрбээр 2002 онд Монгол Улсын Шинжлэх ухааны академийн гишүүнээр сонгогдож, ШУА-ийн Хими болон Физикийн хүрээлэнд эрдэм шинжилгээний ажилтан, Хими, хими технологийн хүрээлэнд лабораторийн эрхлэгч, эрдэмтэн нарийн бичгийн даргаар ажиллаж байгаад 2001-2009 онд ШУА-ийн эрдэмтэн нарийн бичгийн дарга, 2009 оноос ШУА-ийн тэргүүн дэд ерөнхийлөгчөөр сонгогдон ажиллаж байсан аж.

1996 онд Монгол Улсын Төрийн соёрхол, 2006 онд Монгол улсын Шинжлэх ухааны гавьяат зүтгэлтэн цол хүртжээ.

Г.ХОРОЛ