Бурхны оронд одсон ч өв хөрөнгөө арвижсаар байгаа алдартнууд байна. “Форбес” сэтгүүл жил бүр ийм алдартнуудын жагсаалтыг гаргадаг бөгөөд энэ 2016 оны ээлжит жагсаалтаа гаргажээ. Жагсаалтыг поп од Майкл Жексон тэргүүлсэн хэвээр байна.

2015 оны дундаас энэ оны дунд үе хүртэл Майкл Жексоны хөрөнгө 825 сая ам.доллараар нэмэгджээ. Энэ орлогын дийлэнхийг /750 сая ам.доллар/ Майкл Жексоны мэдэлд байсан The Beatles-ийн дуунуудын катологийн эрхийн тал хувийг худалдсанаас оржээ. Энэ наймаа өнгөрсөн гуравдугаар сард хийгдсэн юм.

Forbes сэтгүүлийн жагсаалтыг Майкл Жексон дөрөв дэх жилдээ дараалан тэргүүлж байна. Хоёрдугаарт нь Чарли хүү болон Снупи  нохойны тухай Peanuts комиксийн  зохиолч, зураач Чарльз Шульц оржээ. Дэлхийн хамгийн алдартай гэх тэр комиксоор хүүхэлдэйн  кино хийгдсэн байгаа. Шульц 2000 онд нас баржээ. Түүний энэ жилийн орлого 48 сая ам.доллар.

Гуравдугаар байрт гольфчин Арнольд Палмер (40 сая доллар) оржээ. Тэрээр 2016 оны есдүгээр сард нас барсан юм.

Мөн чансаанд саяхан нас барсан хөгжимчид болох Принс (тавдугаар байр ба 25 сая ам.доллар), Дэвид Боуи (10,5 сая, 11-р байр) бичигдсэн байна.

Доктор Сьюз нэрээр алдартай хүүхдийн зохиолч ба хүүхэлдэйн кино бүтээгч Теодор Сьюз Гейзель (20 сая, долдугаар байр), физикч Альберт Эйнштейн (11,5 сая, есдүгээр байр), модель Бетти Пейж (11 сая аравдугаар байр) нар жагсаалтад мөн багтжээ. 

Бэлтгэсэн Ш.МЯГМАР