АНУ-ын тусгай төлөөлөгчид Ливийн удирдагч Муаммар Каддафигийн засгийн газрын төлөөлөгчидтэй өнгөрсөн амралтын өдрүүдээр уулзаж, ноён Каддафийг байр сууриа тавьж өгөхийг шаарджээ. Уулзалт өнгөрсөн бямба гаригт Тунист болсон ба АНУ-ын талаас гурван төлөөлөгч, Каддафигийн засгийн газраас дөрвөн төлөөлөгч оролцсон байна.

АНУ-ын гол зорилго нь Каддафийг албан тушаалаас нь буулгах явдал бөгөөд энэ удаагийн уулзалт ямар нэг тохиролцоо, зөвшилцлийн шинж агуулаагүй байна. АНУ-ын төлөөлөгчид Ливийн сөрөг хүчин болох Үндэсний шилжилтийн зөвлөлийг Ливийн улс төр төдийгүй иргэдэд нөлөөлөгч, тэднийг хөдөлгөгч хамгийн гол хүч хэмээн онцлон тэмдэглэжээ.