Монгол Улсын Их Хурлын дарга Миеэгомбын Энхболд өнөөдөр /2016.09.01/ Хөдөлмөрийн гавьяаны улаан тугийн одонт Нийслэлийн Сүхбаатар дүүргийн лаборатори 1 дүгээр дунд сургуулийн 94 дэх хичээлийн шинэ жилийн нээлтийн үйл ажиллагаанд оролцлоо.

Тэрбээр Монголын ууган дунд сургуулийн багш, сурагч, эцэг эхчүүдэд хандаж хэлсэн үгэндээ “Нийслэлийн 1 дүгээр дунд сургууль бол Монгол Улсын ууган дунд сургуулийн нэг. Энэ сургуульд суралцана, элсэж орно гэдэг бол их аз жаргал, их хувьтай үйл явдал гэж хүүхдүүд та бүхэн бодох ёстой. 1 дүгээр сургуулиас сургуулийнхаа нэрийг дүүрэгтээ гаргасан, дүүргийнхээ нэрийг нийслэлд алдаршуулсан, нийслэл хотынхоо нэрийг тив дэлхийд алдаршуулсан эрдэмтэй, мэргэн хүүхэд, залуучууд олонтаа төрж гарсан алдартай сургууль юм. Энэ сургуульд сурна гэдэг, эндээс гарч бие хүн болж хүмүүжинэ гэдэг бол улс орны өмнө тулгамдаж байгаа олон хүнд бэрхшээл зорилтуудыг биелүүлж, түүнийг даван туулах чадвартай хүмүүс болж хүмүүжин төлөвшинө гэсэн үг. Тийм учраас хүүхэд багачууд та бүхэн хичээл номондоо шамдан сайн суралцаж, сургуулийнхаа нэрийг бодож, эх орондоо хэрэгтэй эрдэм боловсролтой хүмүүс болоорой гэж хүсэн ерөөе. Мөн энэ сургуульд ажиллаж байгаа багш нар бол улсын хэмжээнд ажил үйлсээрээ шалгарсан тэргүүний сайн багш нар байдаг. Энэ сургуульд хичээл зааж байгаа багш нарын сургалтын арга зүйг улс орон даяар түгээж, дэлгэрүүлж хэрэглэдэг. Монголын боловсролын сор нь болсон багш нар ажиллаж ирсэн түүхтэй” хэмээгээд тус сургуулийн Мэдээлэл зүйн кабинетын техник, тоног төхөөрөмжийг шинэчилхэд зориулж 20 ширхэг компьютер бэлэглэв.

Хичээлийн шинэ жилийн нээлтийн үеэр тус сургуулийн сурагчид дуулж, бүжиглэж, морин хуурын аялгуугаар хүндэт зочид болон эцэг эхчүүддээ бэлэг барив. Нээлтийн дараа УИХ-ын дарга М.Энхболд болон албаны хүмүүс тус сургуулийн үйл ажиллагаатай танилцав. Мөн УИХ-ын дарга өөрийн сурч байсан танхимдаа орж, багш сурагчидтай уулзлаа.

Хөдөлмөрийн гавьяаны улаан тугийн одонт Нийслэлийн Сүхбаатар дүүргийн лаборатори 1 дүгээр дунд сургууль 2016-2017 оны хичээлийн жилийг 1-12 дугаар ангийн 61 бүлгийн 2900 сурагчтайгаар эхлүүлж байгаагаа тус сургуулийн захирал Б.Төгсжаргал танилцуулав.

Уг нээлтийн үйл ажиллагаанд БСШУСЯ-ны Боловсролын бодлогын газрын дарга Д.Эрдэнэчимэг, НЗДТГ-ын Гэр хорооллын хөгжил, нийгмийн асуудал хариуцсан төслүүдийн удирдагч, Нийслэлийн Засаг даргын орлогч Ш.Анхмаа, Нийслэлийн боловсролын газрын дарга Ж.Гантулга, тус сургуулийн 19 дэх захирал, Монгол Улсын гавьяат багш Ц.Гүррагчаа болон албаны бусад хүмүүс оролцлоо гэж Улсын Их Хурлын Тамгын газрын Хэвлэл мэдээлэл, олон нийттэй харилцах хэлтсээс мэдээлэв.

УИХ-ын дарга М.Энхболдын Хөдөлмөрийн гавьяаны улаан тугийн одонт Сүхбаатар дүүргийн лаборатори 1 дүгээр дунд сургуулийн 2016-2017 оны хичээлийн жилийн нээлтийн үйл ажиллагаанд хэлсэн үг

2016.09.01

Эрхэм хүндэт багш сурган хүмүүжүүлэгчид ээ,

Хүүхэд багачууд, сурагчид аа,

Та бүхэнд болон та бүхнээр уламжилж, Нийслэлийн 1 дүгээр дунд сургуулийн энэ хүндтэй индэр дээрээс Монгол Улсын өнцөг булан бүрт хичээлийн шинэ жилийн нээлтийг хийж байгаа хүүхэд багачууд, багш, эцэг эхчүүдэд баярын мэндчилгээг өргөн дэвшүүлье.

Жил бүрийн 09 дүгээр сарын 01-ний өдөр хичээлийн шинэ жилийн нээлт болж, хүүхэд багачууд сургуульдаа, анги танхимдаа цуглаж, зуныхаа амралтаар болсон үйл явдлууд, зуныхаа даалгаварыг хийж хэрэгжүүлэх талаар болон ямар амжилт гаргасан талаараа ярилцаж хөөрөлцөж, ижил дасал болсон хүүхдүүд сургуулийнхаа анги танхимд цугладаг. Сурагч хүүхдүүдээ хүлээсэн, хүссэн багш нар хүүхэд багачуудтайгаа уулздаг. Арван жилийн босгыг анх алхаж байгаа алдрай бяцхан хүүхдүүд цүнхээ үүрч, сургуульдаа ирдэг. Ийм сайхан баярт үйл явдал болдог уламжлалтай. 1 дүгээр сургууль бол Монгол Улсын ууган дунд сургуулийн нэг. Энэ сургуульд суралцана, элсэж орно гэдэг бол их аз жаргал, их хувьтай үйл явдал гэдгийг хүүхдүүд та бүхэн бодох ёстой. Энэ сургуулиас сургуулийнхаа нэрийг дүүрэгтээ гаргасан, дүүргийнхээ нэрийг нийслэлд алдаршуулсан, нийслэл хотынхоо нэрийг тив дэлхийд алдаршуулсан эрдэмтэй, мэргэн хүүхэд, залуучууд олонтой төрж гарсан алдартай сургууль юм. Энэ сургуульд сурна гэдэг, эндээс гарч бие хүн болж хүмүүжинэ гэдэг бол улс орны өмнө тулгамдаж байгаа олон хүнд бэрхшээл зорилтуудыг биелүүлж, түүнийг даван туулах чадвартай хүмүүс болж хүмүүжин төлөвшинө гэсэн үг. Тийм учраас хүүхэд багачууд та бүхэн хичээл номондоо шамдан сайн суралцаж, сургуулийнхаа нэрийг бодож, эх орондоо хэрэгтэй эрдэм боловсролтой хүмүүс болоорой гэж хүсэн ерөөе.

Мөн энэ сургуульд ажиллаж байгаа багш нар бол улсын хэмжээнд ажил үйлсээрээ шалгарсан тэргүүний сайн багш нар байдаг. Энэ сургуульд хичээл зааж байгаа багш нарын сургалтын арга зүйг улс орон даяар түгээж, дэлгэрүүлж хэрэглэдэг. Монголын боловсролын сор нь болсон багш нар ажиллаж ирсэн түүхтэй. Энэ сургуульд Монголын боловсролын салбарын алдар нэртэй, эрхэм гавьяа хүртсэн Д.Гомбосүрэн захирал, С.Цагаан багш, Р.Цэрэннадмид багш гээд олон хүндтэй ахмад буурлууд ажиллаж байсан. Би хувь хүнийхээ хувьд энэ сургуультай амьдралаараа холбоотой. Би 1982 онд энэ сургуулийг төгсөж, Монгол Улсын Их Сургуульд орж, суралцаж байсан. 1952 онд миний ээж, аав хоёр энэ сургуулийг төгсөж байсан. 2000 оны эхэн үед миний хүү, охин хоёр ч энэ сургуулийг төгссөн. Надад орос хэлний хичээл зааж байсан, хүүгийн минь ангийг удирдаж байсан Монгол Улсын гавьяат багш Ш.Дулмаа энд сууж байна. Миний гэр бүлийн хүнд гэр ахуйн хичээл зааж байсан, миний охины анги даасан багш Отгонжаргал мөн энд сууж байна. Ингээд үзэхээр миний ээж аав, үр хүүхдүүд энэ сургуулиас эрдэм номын анхны алхамаа хийж, амьдралтайгаа залгаж байсан сайхан сургууль юм. Сургуулийнхаа энэ жилийн хичээлийн шинэ жилийн нээлтэд оролцож байгаадаа туйлын баяртай байна. Хамт суралцаж байсан нөхдүүд маань ч гэсэн өнөөдөр хүүхэд, багачуудаа сургуульдаа элсүүлэхээр ирсэн байгаа харагдаж байна. Нийслэлийн 1 дүгээр дунд сургуульд элсэн орсон нэгдүгээр ангийн хүүхдүүд, суралцаж байгаа нийт сурагчиддаа сурлагын өндөр амжилт хүсэн ерөөе.

Эрдэм номын цагаан буян та биднийг ивээж, тэтгэж байхын ерөөлийг дэвшүүлье.

Би сургуулийн нээлтэд хүрэлцэн ирсэн завшааныг тохиолдуулан мэдээлэл зүйн кабинетын техник, тоног төхөөрөмжийг шинэчилхэд зориулж 20 ширхэг компьютер бэлэглэж байна. Түүнийхээ дээжийг сургуулийн захиралд гардуулан өгье.

Та бүхэнд сайн сайхан бүхнийг хүсэн ерөөе.