Монгол Улсын соёлын гавьяат зүтгэлтэн, Буриад улсын урлагийн гавьяат зүтгэлтэн Д.Ухнаагуай Монголын рок попын хамтлаг, дуучдын анх гарч ирж байх үеийн зурагт хуудас, бичлэг цуглуулах дуртай гэнэ. Түүний цуглуулгад одоогоор 500 гаруй зурагт хуудас, 400-гаад видео бичлэг байдаг гэсэн. Тэрбээр энэ талаараа “Дөнгөж гарч ирж байх үеийн хамтлаг, дуучдын зурагт хуудас, бичлэгийг хэдэн жилийн дараа гаргахад их үнэд хүрнэ. Гэхдээ би дуудлагаар худалдах гэж байгаа юм биш. Энэ бол маш үнэт цуглуулга. Манай хойч үеийнхэнд ихээхэн хэрэгтэй зүйлс байгаа юм. Монголын эстрад, рок поп урлагийн түүх шүү дээ. Яахав хэдэн жилийн дараа шаардлага гарвал би авах хүнд нь зарна. Зүгээр өгөхгүй шүү” хэмээв. Д.Ухнаагуайн үнэт цуглуулгад “Харанга”, “Хурд”, “Өргөө” хамтлагаас эхлээд л рок попын акулуудын анхны зурагт хуудас, тоглолтын бичлэг, анхны клип гээд олон ховор нандин зүйлс байдаг аж.