Монголын хэвлэл мэдээллийн зах зээлд захиалга борлуулалтаараа дахин тэргүүлсэн “Соронз” сэтгүүлийн ээлжит дугаар хэвлэгдэн гарлаа. Цаг үргэлж дуулиан шуугиан, үйл явдлын папараци зургуудаар уйдаадаггүй сэтгүүлийнхээ шинэхэн дугаараа тэсэн ядан хүлээж байсан уншигч та “Hot news” булангаас “Чоно” группийн ерөнхийлөгч Ч.Энхболдынд UBS телевизийн хөтлөгч бүсгүйчүүд бэр орсныг, “Киви”-гийн Агийгийн найз залуу Г.Эрдэнээ улс төрд хүч нөлөөгөөрөө гайхуулдаг эрхэм гишүүний голомт залгах ууган хүүг хурим найр хийгээд удаагүй байхад эрүүг нь хуга цохиж баривчлагдаад байгааг дуулгаж байна. Үүний зэрэгцээ топ модель Ч.Туяацэцэг дуучин Ж.Алтанцэцэгтэй нэг айлын бэр болж буйг баримттайгаар дуулгаж байгаа төдийгүй экс ерөнхий сайд С.Баярын охин уул уурхайн компанийн урилгаар Америкаас ирээд байгааг, шадар сайд М.Энхболдын том охин Лондонгоос ирснийг папараци дурандаа буулгав. Мөн олны нүднээс нууцлаг, хөл ихтэй хуримуудын нэг УИХ-ын гишүүн Р.Гончигдоржийн дунд охин Г.Ариунхишиг ҮШН-ын дарга Ц.Цолмонгийн хүүтэй гэрлэж улстөрчид худ ураг болсныг зөвхөн “Соронз” дурандав. Үүний зэрэгцээ “Женко” Х.Баттулгын төрсөн эгч Х.Цэндбаяр, ТЕГ-ын дарга асан Б.Билэгт гээд сонирхолтой хүмүүсийг дурандаж хамгийн сүүлийн үеийн сонин хачнаас дуулгаж байна.

“Соронз”-ын энэ удаагийн зочноор “Боролдой”-н С.Мягмар уригдаж өөрийн өвөрмөц ертөнцөөсөө хуваалцсан юм.

Үндэсний их баяр наадмын гоёлыг уншигч та сонжоорой. Энэ жил дуучин Д.Болдын төрийн ордонд дэлгэрүүлсэн лам захтай дээлний мода улс төр, урлагийнханд хэрхэн зохисон бол. Мөн МУ-ын ерөнхийлөгчийн хүүхдүүд “Соронз”-ын дуранд өртсөн бөгөөд том хүү Э.Оргил нь  найз охиныхоо хамт байгаа жаргалтай агшныг зөвхөн “Соронз”-оос сонирхох болно. Үүний зэрэгцээ “Соронз” урлагийн сайхан бүсгүйчүүдээ дурсан сануулахыг хүч “Харгис урлагийн хатан завилгаанууд” буюу балетын урлагийн хатагтай нар болох АЖ Ю.Оюун, С.Үрлээхүү, Ч.Ачтуяамаа, Р.Туяацэцэг, Х.Гэрэлчимэг, Сугармаа, Ч.Батцэнгэл хэмээх гайхалтай хүмүүсийн талаарх мэдээллийг фото зургийн хамт нийтэллээ. Мөн зургаан цаг оочерлон байж авдаг Hermes-ийн цүнхийг Монголоос хэн гэгч эрхэмсэг хатагтай нар өөрийн болгосныг фото зурагтайгаар нийтэлж байна. Харин шинэ дугаарын “Гол дүр”-ээр саунд инженер Рагугийн гэргий Н.Өнөрчимэг уригдсан нь учиртай. Монголын нэртэй угсаатны зүй судлаач Х.Нямбуу агсны ууган охин тэрээр дэлхийн нэр хүндтэй байгууллагуудад ажилладаг гээд арвин намтартай нэгэн юм. Урлаг соёлынхныг ч хаана юу хийж явааг сортоотой ангуучилдаг “Соронз” мисс Д.Ариунцэцэг Бээжингийн дэлгүүрийн хямдралуудыг гүйцээж, дуучин Э.Минжинсорын ихэр охид Монгол хэл сурч байгаа гээд олон сонирхолтой мэдээллийг хүргэж байна. Аагим халуун эхэлсэн энэ өдрүүдэд “Соронз” түүнээс ч дутахгүй халуухан мэдээллүүдийг хуудас бүртээ багтаан уншигчиддаа барьж байгаадаа баяртай байна.