МОНЦАМЭ агентлагийнхан өнөөдөр 90 жилийнхээ ойг тэмдэглэж байна. Улсын драмын эрдмийн театрт болж буй ойн баярын хуралд 21 аймаг дахь сурвалжлагч, Вашингтон, Москва, Бээжин дэх тусгай сурвалжлагч нар нь хүрэлцэн ирээд байна. Түүх сөхвөл, одоогоос 90 жилийн өмнө 1921 оны гуравдугаар сарын 18-нд МОНТА нэртэй сонин хилийн чанадад хэвлэгдэн гарсан нь эдүгээгийн МОНЦАМЭ агентлагийн анхны хэвлэл байсан аж. Мөн 1921 оны долдугаар сарын 19-ний өдөр Монголын Засгийн газрын гишүүдийн зургадугаар хурлаар Дотоод хэргийн яамны харьяанд “Шуудан бичиг, цахилгаан мэдээний ерөнхий хороо”-г албан ёсоор байгуулсан нь өнөөгийн МОНЦАМЭ  агентлагийн тулгын чулууг тавьжээ. Тус агентлаг 90 жилийн сүүдэр зооглохдоо 30 гаруй улсын мэдээллийн агентлагтай мэдээ материал солилцон ажиллах болж, хятад, япон, орос, англи хэл дээр болон монгол бичгээр долоо хоног тутам сонин гаргаж, өдөр тутмын мэдээ мэдээллийн “МОНЦАМЭ мэдээ” дотоод сониндоо нийтлэхээс гадна өдөр бүр орос, англи хэл дээрх мэдээг гадаадын агентлагуудад илгээдэг болжээ.

МОНЦАМЭ агентлагийнхандаа ойн баярын мэнд хүргэе.