Яруу найрагч, зохиолч Л.Өлзийтөгсийн нүүр номын хуудастаа бичиж буй зураачдын тухай цуврал өгүүллийг news.mn сайт албан ёсны зөвшөөрөлтэйгээр танд хүргэж байна.
Контемпорари урлагийг ойлгоход тийм ч амар биш. Орчин цагийн уран бүтээлчдийн сэтгэлгээг ойлгож хүлээн авахын тулд эхлээд ХХ зууны урлагаа баримжаалах хэрэгтэй. Тиймээс ХХ зууны сор бүтээлийн антологи болон дүрслэх урлагийн түүхийн бусад номыг эх үүсвэр болгон, өөрийн сонголтоор, эхний ээлжинд 50 зураачийн бүтээлээр бяцхан бичвэр бэлдлээ. ӨГ-ийн дугаар бүрээс та зураачдын бүтээлийг задалсан товч тайлал, эсвэл бичил эсээ унших бөгөөд үүний заримыг шууд орчуулж, заримыг нь өөрөө бичсэн болно. ӨГ галерейд тавтай морил!
ӨГ=18
ҮС-нээс ургасан ҮС
За, ер нь болвол эмэгтэй зураачдын “үстэй” ажлууд эрэгтэй зураачдынхаас илүү байх шиг санагддаг шүү. Үсчин хүүхнүүд мандтугай!
Мерет Опенхаймийн, амьтны үсээр доторлосон аягыг та мэднэ. Сюрреализмын гоц ажлуудын нэг. Харин орчин цагийн зураачид инсталляци, перформанс, уран зураг, баримал, фото артын бүх хэлбэрт үсийг өргөнөөр ашиглаж байна. Миний бодлоор энэ бүхэн Фридагийн бүтээлээс эхэлсэн. Аль ч хэлбэр төрөлд нь ялгаагүй, ҮС ороод ирэхээрээ л ер бусын амьд, сэрдхийм болдгийг анзаарсан шүү! 14 жилийн өмнө хэвлүүлсэн нэг номондоо ҮС гэдэг нэртэй, эрэлхийллийн хэлбэрт шүлэг оруулсан. Нялх охиныхоо даахийг үргээх үед төрсөн тэр л цочир сэтгэгдлээрээ бичсэн юм. Хуруугаа эсгэх төдийд л өвдөж хашгирдаг атлаа үсийг маань туг тугаар хайчлаад авч байхад бид юу ч мэдэрдэггүй. Үсчний толины өмнө, “өөрсдөөсөө” хайчаар таслуулж байхдаа бид эвшээж, эсвэл инээж суудаг. “Хүн болвоос үнэхээрийн мэдрэмжгүй амьтан ажээ, хө” гэж бодоод л бичсэн шүлэг. Номоо хэвлэлд бэлдэхдээ тохирох зураг олох гээд “үстэй” ажлуудыг их хайж, сонирхож билээ. Гэхдээ энэ бол саяхны бүтээл. Зураач нь Эрин Кэйс. Залуухан бүсгүй. Тэр дэлхийд алдаршсан уран бүтээлч биш ээ, санаандгүй сонгочихлоо. Фото эвлүүлэг хэлбэрээр хийсэн энэ коллаж зохицлоо сайхан олж. Зохицолтой гэдэг бол дүрслэх урлагийн хэлээр зохиомж сайтай л гэсэн үг. Энэ бүсгүйн үс зүгээр ч нэг сул хэлбэртэй, “парик” маягийн биш, гоёмсог сүлжээстэй, бүр ширхэг ширхэгээрээ өрвийн сөрвийж, бага зэрэг сэгсийж орхисон нь ихээхэн амьд шинжтэй болгожээ. Ямар ч хиймэл аясгүй, хаа нэгтээ ийм хүн буй мэт, ийм байх ч боломжтой мэт сэтгэгдэл төрнө. Нүүрэн доторх байгалийн дүрслэлийг харваас яавч зуны дэлгэр цаг биш, ногоон өнгө ч алга. Намар цаг! Бүсгүйн үсний өнгө намрын гандангуй аястай төгс хосолж шүү! Бие галбирыг нь харваас залуухан бүсгүй. Харин уулс, улирлын байдал нь хөгшин, холхи, хатуу, чанд.
Хөвгүүд ээ! Яг одоо дэргэд чинь сууж буй, эсвэл гараас чинь хөтлөөд алхаж буй арван зургаатай охины биед мянган жилийн амьдралтай хөгшин сүнс яваа ч юм билүү? Чи түүнтэй мянган жилийн өмнө бас л ийн хөтлөлцөөд алхаж явсан ч юм билүү, хэн мэдлээ :))
Эцэст хэлэхэд, ердийн энэ эргэцүүлэл “Үснээс миний ургуулсан үс” бөлгөө. Сайтар самнан арчлагтун, тэгээд өөрийнхөө дотроос ахин ийм нэг үс ургуулагтун.
ЖИЧ: Коллаж гэдэг нь янз бүрийн зүйлийг нийлүүлж (сонин сэтгүүлийн хайчилбар, өнгийн цаас, даавуу, фото, номын хуудас гэх мэт), тэдгээрийг зохиомжлон шинэ бүтээл бий болгодог, дүрслэх урлагийн нэгэн арга техник.
ЭХ СУРВАЛЖ: ӨЛЗИЙТӨГС ЛУВСАНДОРЖ
