Бөхийн төрлүүдийн 23 хүртэлх насны Дэлхийн аварга шалгаруулах анхдугаар тэмцээн өчигдөр//2017.11.23/ Польшийн Быдгош хотод эхэллээ. Чөлөөт бөхийн тэмцээн өчигдөр эмэгтэйчүүдийн 55, 58, 63, 75 кг-ын жингийн барилдаанаар эхэлж, медальтнууд тодорсон бөгөөд манай улсаас дэвжээнд гарсан бөхчүүдээс 58 кг-д А.Батцэцэг мөнгөн медаль хүртлээ. Тэрбээр эхний барилдаанаа 2015 оны залуучуудын дэлхийн аварга Шведийн Элин Йоханна Нильссоныг 2:1-ээр, шөвгийн наймд Энэтхэгийн Сангеета Сангеетаг цэвэр, хагас шигшээд БНХАУ-ын Ван Шиаосенийг оноогоор цэвэр (10:0) ялж, алтан медалийн төлөөх барилдаанд залуучуудын дэлхийн хошой аварга Японы Юзүрү Күманод 1:6-гаар ялагдсан юм. 

“U-23”-ын ДАШТ-ий анхны медальтан А.Батцэцэг өсвөр үе, залуучууд, 23 хүртэлх гэсэн гурван насны ангиллын ДАШТ-ээс медаль хүртсэн Монголын чөлөөт бөхийн түүхэнд анхны тамирчин боллоо. Гавьяат тамирчин Сүхээгийн Цэрэнчимэд өсвөр үе, залуучууд, насанд хүрэгчдийн ДАШТ-ээс медаль хүртсэн байдаг. Түүнчлэн А.Батцэцэг гурван жилийн давтамжтай гурван насны ангиллын ДАШТ-ээс (“Сомбатхей-2011” өсвөр үеийн ДАШТ-ээс мөнгө, “Загреб-2014” залуучуудын ДАШТ-ээс алтан медаль хүртсэн) медаль хүртээд байна.

“U-23”-ын ДАШТ-ий мөнгөн медальтан А.Батцэцэг 2014 оны залуучуудын дэлхийн болон Азийн аварга, 2011 оны өсвөр үеийн ДАШТ-ий мөнгө, Азийн АШТ-ий алт, 2015 оны Иван Ярыгиний “Алтан Гранпри”-гийн мөнгө, 2014, 2017 оны хүрэл, Чувашийн Ерөнхийлөгчийн нэрэмжит цомын нээлттэй тэмцээний мөнгө, хүрэл, Дмитрий Миндиашвилигийн нэрэмжит ОУТ-ий алт, “Mongolia Open” ОУТ-ий нэг алт, хоёр мөнгө, нэг хүрэл, насанд хүрэгчдийн УАШТ-ий алт, мөнгөн медаль хүртсэн бөгөөд “Хасу-Мегастарс” клубийн тамирчин юм. 

‘Быдгощ-2017’ U23 ДАШТ-ий хоёр дахь өдөр эмэгтэйчүүдийн 48, 53, 60, 69 кг-ын жингийн барилдаан болох бөгөөд Улаанбаатарын цагаар 18.00 цагаас эхэлнэ.  

Манай бөхчүүд: 

• 48 кг (15 бөх)-Б.Чимгээ гоц мөргөөд Украины бөхтэй
• 53 кг (18 бөх)-Г.Отгонжаргал эхлээд гоц мөргөнө, дараа нь Хятадын бөхтэй
• 60 кг (15 бөх)-Э.Гантуяа эхлээд Казахстаны бөхтэй
• 69 кг (18 бөх)-Г.Пүрэвсүрэн эхний тойрогт гоц мөргөөд Азербайжаны бөхтэй тус тус хүч үзэхээр болсон байна.

Сугалааг www.unitedworldwrestling.org хаягаар харах бөгөөд барилдааны stream-ийг ч тус вэб хаягаар үзээрэй. 

Ч.БОЛОР

Эх сурвалж: МЧБХ