Их Монгол улс байгуулагдсаны 805, Монголын үндэсний тусгаар тогтнолын 100 жил, Ардын хувьсгалын 90 жил зэрэг түүхэн тэмдэглэлт ойнууд давхцаж буй энэ үед БСШУЯ, АНУ-ын судлаач, ноён Дон Лессем, Монголын Үндэсний Музей, Монголын Урлагийн Зөвлөл хамтран АНУ, Сингапурт гарсан “Чингис хаан”  үзэсгэлэнгийн зарим үзмэрүүдийг өнөөдрөөс Монголын Үндэсний Музейд үзэгч олноо толилуулж эхэллээ. Үзэсгэлэн нь Чингис хааны улс төрийн зүтгэлтэн, дипломатч, шударга ёсыг тогтоогч, суу билэгтэн талаас нь харуулахыг зорьжээ.

Үзэсгэлэнгийн үзмэрийн дийлэнх хэсгийг Монголын Үндэсний Музейн үзмэрүүд бүрдүүлж байгаа бөгөөд Чингис хааны тахин дээдэлж байсан хар, цагаан сүлд, Мөнх хааны гэрэлт хөшөө, гэр тэрэгний болон тэрэгний цөн, монгол цэргийн хөө хуяг, ширэн хуяг, нум сум, сумын зэв, саадаг, ваар шаазан, анжисны хошуу, төмөр шанага, ширмэн тогоо, хусуур, ооль, язгууртны дээл, ялтсан гутал зэрэг хосгүй үнэт, үнэт, ховор үзмэрүүдийг толилуулж байна. Мөн өрнө, дорныг холбосон худалдаа, эдийн засгийн чөлөөт бүсийг буй болгосны гэрч болох их хаадын алт, мөнгөн зоосыг эх хувиар нь энэ үзэсгэлэнгээс үзэж болно.

Үзэсгэлэн 2009 оны хоёрдугаар сараас АНУ-ын Хьюстен, Денвер, Сан Хосе хот болон Сингапур улсад гарч нийт 300 гаруй мянган үзэгчид үзэж сонирхсон байна. Өнөөдрөөс Монголын сонирхогчид хүрч буй дээрх үзэсгэлэн нь ирэх аравдугаар сарын 10 хүртэл ажиллах ажээ.