Өвлийн эхэн сарын шинийн нэгэн буюу их эзэн Чингис хааны мэндэлсэн Монгол бахархлын өдөрт зориулсан чансаа өндөр 128 бөхийн барилдаан 14.00 цагаас Бөхийн өргөөнд эхэллээ.

Улсын арслан Э.Оюунболд, гарьд Н.Ганбаатар нарын тэргүүтэй бөхчүүд зодоглож буй уг барилдааныг аварга Ч.Санжаадамба бэртлийн улмаас өнжсөн мэдээлэл байна. Чансаа өндөр бөхчүүдийн барилдаан атлаа өндөр цолтнууд цөөн барилдаж байгааг бөх сонирхогчид шүүмжлэн, аварга, арслангуудыг үгүйлэн, П.Бүрэнтөгс, Ц.Содномдорж, Р.Пүрэвдагва, Н.Батсуурь, Ө.Бат-Орших нарын энэ цаг үеийн өндөр цолтнуудыг сураглаж байна.

Том цолтой бөхчүүд Монгол бахархлын өдрийн барилдаанд зодоглоогүй нь энэ амралтын өдрүүдэд Өвөр Монголд Алтан бүсийн наадам болж буйтай холбоотой бололтой.

Алтан бүсийн наадам өчигдөр /2017.11.18/ Ордос хотноо эхэлсэн бөгөөд Монгол, Өвөр монгол, Тажикстан, ОХУ, Франц, Бразиль, Асвтрали, АНУ, Канад болон Хятадын 256 бөх зодоглож байгаа ажээ. Шагналын сан өндөртэй эл барилдаанд арслан П.Бүрэнтөгс, Н.Батсуурь, Р.Пүрэвдагва, гарьд Ө.Бат-Орших, заан Б.Пүрэвсайхан нарын 20-иод барилдахаар явсан сураг байна.

Бөхийн өргөөнд болж буй барилдааны тайлбарлагчийн ярьснаар улсын заан М.Өсөхбаяр, Н.Жаргалбаяр, харцага О.Хангай тэргүүтэй бөхчүүд БНСУ-д болж буй сырим бөхийн тэмцээнд оролцож байгаа ажээ.

Монгол бахархлын өдөрт зориулсан барилдааныг анх 2012 онд анх зохион байгуулсан бөгөөд аварга Ч.Санжаадамба хоёр удаа, улсын гарьд Ө.Бат-Орших, арслан П.Бүрэнтөгс, Р.Пүрэвдагва нар тус бүр нэг удаа түрүүлж байжээ.

Б.АНХ