Хилийн албаны төв комиссын VIII хуралдаан саяхан болж, өнгөрсөн зургадугаар сард Монгол Улсын хилд гарсан хилийн зөрчил болон шийдвэрлэлтийн талаар авч хэлэлцсэн байна. Тодруулбал, өнгөрсөн зургадугаар сард Монгол-Хятадын хилд хоёр удаагийн гурав, Монгол-Оросын хилд долоон удаагийн 15 хилийн зөрчил гарсныг хилийн албаныхан шуурхай илрүүлж, холбогдох арга хэмжээг авч ажиллажээ.  Нэг үгээр хэлбэл, хилийн зөрчлийн 22.3 хувь нь Монгол-Хятадын хилд, 77.7 хувь нь Монгол-Оросын хилд гарсан байна. Энэ нь өмнөх оны мөн үетэй харьцуулахад хилийн зөрчил 35.7 хувиар, буурсан үзүүлэлт юм байна.

Гэхдээ хил орчмын бүсэд зөрчил гарах тохиолдол буурахгүй байгаа аж. Тухайлбал, Монгол-Хятадын хилд долоон удаагийн 28 хүн, Монгол-Оросын хилд хоёр удаагийн таван удаагийн зөрчил гарсан нь өмнөх оны мөн үетэй харьцуулахад зөрчил 11.1 хувиар, зөрчигчдийн тоо 30.3 хувиар тус тус өссөнийг харуулж буй аж.

Монгол Улсын хилд дээрх сард гарсан хилийн зөрчлийн илрүүлэлт 97 хувь, шийдвэрлэлт 93 хувьтай юм байна. Харин хилийн 24 боомтоор 54 орны 423813 зорчигч, 172499 тээврийн хэрэгслийг шалган нэвтрүүлж, улсын хилийг гадаадаас зөрчсөн 24, дотоодоос зөрчихийг завдсан зургаан хүнийг саатуулан Хилийн тагнуул болон Цагдаагийн байгууллагад шилжүүлжээ. Мөн Захиргааны хариуцлагын тухай хуулийн дагуу 12 хүнд 1,1 сая төгрөгийн торгууль ногдуулсан байна. Хуралдаанаар цаашид авах арга хэмжээний талаар хэлэлцэж, албандаа амжилт гаргасан болон хариуцлага алдсан албан тушаалтны талаар “Эх орны манаа” сонинд нийтэлж байхаар шийдвэрлэжээ.