“Eagle” телевиз гурав дахь жилдээ үндэсний их баяр наадмын сурын харвааг үзэгч та бүхэнд шууд дамжуулан хүргэж байна. Сурын харвааг өөр телевизүүд шууд дамжуулдаггүй тул зөвхөн “Eagle”-ээс цэц мэргэн харваачдын наадмыг үзэх боломжтой юм. Тус телевизийн уран бүтээлчид шууд нэвтрүүлэгтээ өндөр ач холбогдол өгч, олон камер ашиглан сурын харвааг дамжуулж байгаа аж. Түүгээр зогсохгүй маргаашнаас эхлэн наадмын хоёр өдөр “Eagle” телевизийн шууд нэвтрүүлгийн студи Төв цэнгэлдэх хүрээлэнд "зочилж", сурын талбайн дэргэд байрлах тул үзэгч та “Eagle”-ийн студитэй цэнгэлдэхийн гадаа "уулзаж" болох нь ээ.

Монголын тулгар төрийн 2220, Их Монгол улс байгуулагдсаны 805, Үндэсний эрх чөлөөний хувьсгалын 100, Ардын хувьсгалын 90 жилийн ойн их баяр наадмын сур харваа долдугаар сарын 8-ны өдөр урианхай сурын харваагаар эхэлж, өчигдөр буриад сурын харваагаар үргэлжилсэн бол өнөөдөр баяр наадмын  халх сурын харваа эхэллээ.

Энэ жилийн наадамд хот, хөдөөгийн 350 орчим харваач оролцож байгаагийн 32 нь Улсын мэргэн цолтнууд байгаа бол спортын мастер 120, дэд мастер цолтой харваач 30 гаруй ирсэн байна. Хана харваагаар эхэлсэн халх сурын харваанд харваач бүр нийт 40 сум тавих юм. Маргааш тус наадам хасаа харваагаар үргэлжлэх бөгөөд долдугаар сарын 12-ны мягмар гаригт шигшээ харваа болж, цэц мэргэд тодрох юм.