Японы мэргэжлийн сүмо бөхийн арваннэгдүгээр сарын Кюүшюү башё Фүкүока хотноо үргэлжлэн явагдаж байна. Кюүшюү башёгийн дөрөв дэх өдрийн барилдаан өчигдөр боллоо. Башёгийн дээд зиндааг ёкозүна Хакүхо М.Даваажаргал, озэки Гоэйдо, Такаясү болон маэгаширагийн 4-с барилдаж буй Ичиножёо А.Ичинноров нар нэг ч унаагүй тэргүүлж байна.

Өчигдрийн барилдаанд үлэмж биет Ичиножёо Араваши Э.Дөлгөөнийг давснаар дөрөв дэх даваагаа авч тэргүүлэгчдийн эгнээнд бичигдэж эхэллээ.

Ёкозүна Кисэносато Такакешод ялагдсанаар 2 даваа, 2 унаатай болж, тэргүүлэгчдийн гуравдугаар эгнээ рүү шилжлээ. Кисэносато эхний өдөр Тамаваши Б.Мөнх-Оргилд ялагдсан юм.

Манай өндөр цолтой бөхчүүдээс сэкивакэ Тэрүнофүжи Г.Ган-Эрдэнэ нэг ч даваа авалгүй дөрвөн унаатай башёг үргэлжлүүлж байна.

Кюүшюү башё энэ сарын 26-ны өдөр өндөрлөнө.

Ёкозүна Кисэносато 2 даваа, 2 унаатай болж, тэргүүлэгчдийн гуравдугаар эгнээ рүү шилжлээ. 

Сэкивакэ Тэрүнофүжи Г.Ган-Эрдэнэ комүсүби Котошигикүд ялагдаж, 4 унаатай боллоо. 2017.11.15

Ч.БОЛОР