“Ерөөлч, магтаалчдын Улсын VII уралдаан”  өнөөдөр /2017.11.11/ нээлтээ хийлээ. Уг уралдаан монгол үндэстний соёлын биет бус өвийн өвөрмөц төрөл ерөөл магтаалыг хадгалж, хамгаалах, сэргээн хөгжүүлэх, хойч үедээ өвлүүлэн үлдээж, ерөөлч, магтаалчдыг алдаршуулах зорилготой.  Амралтын хоёр өдөр үргэлжлэх тус уралдааныг Боловсрол, соёл, шинжлэх ухаан, спортын яам, Засгийн газрын хэрэгжүүлэгч агентлаг Соёл, урлагийн газар болон “Монголын ерөөлч, магтаалч нарын төв”хамтран зохион байгуулж байна.

Уралдааны нээлтэд Засгийн газрын хэрэгжүүлэгч агентлаг Соёл, урлагийн газрын дарга Г.Эрдэнэбат, БСШУСЯ-ны Соёл, урлагийн бодлогын газрын дарга Н.Болд нар үг хэлж, нийт оролцогч ерөөлч, магтаалчдад амжилт хүсэв. Монгол Улсын Ардын жүжигчин, Соёлын гавьяат зүтгэлтэн, Хэл бичгийн ухааны доктор, Төрийн хан хуурч, ерөөлч, магтаалч Ц.Цэрэндорж хуурдаж, уралдааныг эхлүүлсэн.

Уралдаанд аймаг тус бүрээс нэг ерөөлч, нэг магтаалч оролцож байгааг зохион байуулагчид ярив.

Улсын уралдааны эцсийн шалгаруулалтад оролцсон уран бүтээлчид болон тэргүүн байрын шагналтнуудын нэгдсэн гала тоглолт арваннэгдүгээр сарын 12-ны 18.00 цагаас Улсын филармонийн концертын танхимд болно.

Д.УУДАМ