ӨНӨӨДӨР АРВАННЭГДҮГЭЭР САРЫН 09

ХОТЫН ЦАГ АГААР

Үүлэрхэг. Цас орж, цасан шуурга шуурна. Салхи баруун өмнөөс хойш эргэж, секундэд 5-10 метр, зарим үед секундэд 12-14 метр хүрч ширүүснэ. Өдөртөө 6-8 градус хүйтэн байна.

энэ өдөр монголын түүхэнд

1921.11.09 Ардын засгийн газраас “Номын хүрээлэн”-гийн дүрмийг батлав.

2015.11.09 Монгол Улсын Ерөнхийлөгч Ц.Элбэгдорж БНХАУ-д төрийн айлчлал хийв. Айлчлал арваннэгдүгээр сарын 11-нд өндөрлөв.

ҮС ЗАСУУЛАХАД ТОХИРОМЖГҮЙ ӨДӨР

Бархасвадь гараг. Билгийн тооллын 21, Өглөгт охин одтой, цагаан хулгана өдөр. Өдрийн наран 7 цаг 56 минутад мандан, 17 цаг 25 минутад жаргана. Тухайн өдөр бич жилтнээ аливаа үйлийг хийхэд эерэг сайн ба үхэр, луу, хонь нохой жилтнээ сөрөг муу нөлөөтэй тул элдэв үйлд хянамгай хандаж, биеэ энхрийлүүштэй. Эл өдөр найз нөхдийг түшиж элдэв үйлийг түргэн бүтээх, бүтээл туурвил эхлэх, бизнэс эхлэх, цар ихтэй үйлийг эхлэх, бясалгал хийх, доодсыг асран өглөг, хандив өргөх, лусыг тахих, хүүхэд үрчлэн авах, хур оруулах, дарханы үйлд сайн. Улааны үйл, төлөг тавих, морь уралдах, сэтгэлд сэвтэй газар очиход муу. Өдрийн сайн цаг нь хулгана, үхэр, туулай, морь, бич, тахиа болой. Хол газар яваар зүүн зүгт одогсод мөрөө гаргавал зохистой. Үс шинээр үргээлгэх буюу засуулахад тохиромжгүй.

ӨНӨӨДӨР БОЛОХ ҮЙЛ ЯВДАЛ

09.00

• Нийслэлийн Иргэний танхимд “Хүүхдийн эрх, хамгаалал ба төр, хуулийн этгээдийн оролцоо” төслийн хүрээнд төрийн албан хаагчийг чадавхжуулах сургалт зохион байгуулна. Сургалтын нээлтэд НИТХ-ын дарга С.Амарсайхан, Нийслэлийн Засаг даргын Ядуурлыг бууруулах, хөдөлмөр эрхлэлтийн асуудал хариуцсан орлогч Д.Энхтөр зэрэг албаныхан оролцоно.
• ШӨХТГ-аас Төрийн ордны Б танхимд Өрсөлдөөний тухай хуулийн шинэчилсэн найруулгын төслийн хэлэлцүүлэг зохион байгуулна.

09.30

• Тархины саажилттай хүүхдийн 10-р сувилал, цэцэрлэгийн эцэг, эхчүүд тус цэцэрлэгт үүсээд байгаа асуудлаар хуучин нурсан цэцэрлэгийн байранд мэдээлэл хийнэ.

09.45

• Монголд зочилж буй Их Британи Умард Ирландын нэгдсэн вант улсын парламент дахь Олон улсын парламентийн бүлгэмийн гишүүн Лимпнигийн Лорд Ховард тэргүүтэй нийт төлөөлөгчид Монголын хөрөнгийн биржийн үйл ажиллагаатай танилцан, арилжаа нээх ёслолд оролцоно.

11.00

• Ерөөлч, магтаалчдын улсын VII уралдааны талаар БСШУСЯ-ны 401 тоотод мэдээлэл хийнэ.

11.30

• “Зууны мэдээ” сонины Үндэсний мэдээллийн төвд “Иргэдийн шударга шүүх” ТББ-аас АТГ-т гомдол хүргүүлэх болсон талаар мэдээлэл хийнэ.
• Урлагийн гавьяат зүтгэлтэн Т.Сэр-Одын “Миний бүтээл-25” уран бүтээлийн цэнгүүний талаар “Монгол нюьс” мэдээлийн төвд хэвлэлийн хурал зарлажээ.

11.40

• Монголбанк, Бичил санхүүгийн хөгжлийн сан, БСШУСЯ-ны харьяа Насан туршийн үндэсний төв Хамтын ажиллагааны санамж бичиг байгуулна. Арга хэмжээ Монголбанкны А байрны захирлуудын зөвлөлийн өрөөнд болно.

ӨНӨӨДРИЙН ЭВЕНТ

• “Мир” номын их дэлгүүр өнөөдрөөс супер хямдрал зарлалаа. Хямдралтай худалдаа “Гранд плаза”-гийн 5-р давхар, ‘Мир ном’-ын дэлгүүрт энэ сарын 12-ныг хүртэл үргэлжилнэ.

ӨНӨӨДРИЙН ҮЗВЭР

19:00

• Канадын “Крис Дерксон Трио” тоглолт “Улаанбаатар” чуулгын байранд болно. Канадын Элчин сайдын яамны урилгаар Монголд айлчлан ирж буй Канадын уугуул иргэн, уран бүтээлч Крис Дерксений үүсгэн байгуулсан “Cris Derksеn Trio” хамтлагийн тоглолтыг Канадын Урлагийн зөвлөл дэмжиж, Монголын урлагийн зөвлөл тоглолтыг зохион байгуулж байгаа юм.

19.00

• Монгол, Японы сонгодог урлагийн уран бүтээлчдийн хамтарсан концерт УДБЭТ-ын тайзнаа тоглогдоно. Монгол, Япон улсын хооронд дипломат харилцаа тогтоосны 45 жилийн ойн хүрээнд зохион байгуулж буй тоглолтод Монголын шилдэг дуурийн дуучид, симфони найрал хөгжим, Японы нэрт төгөлдөр хуурч Кайсэ Кёокотой хамтран оролцоно. Мөн Гавьяат жүжигчин Э.Амартүвшин, Европт ”Турандот”-ийн дүрээр алдаршсан, Болгарын дуурийн театрын гоцлол дуучин Д.Баясгалан нар уригдан иржээ.

20.00

• Инээдмийн “UB Comedy” клубын пүрэв гаригийн тоглолт болно. Энэ оройн хөтлөгч Хану. Бусад уран бүтээлчид Тулгаа, Төөгөө, Амараа, Ганга нар байна.  Хаяг: Сөүлийн гудамж, Хүнсний 50-р дэлгүүрийн замын урд, САНТ АСАР төвийн 2 давхарт, UB Comedy Club