ӨНӨӨДӨР АРВАННЭГДҮГЭЭР САРЫН 8​​​​​​​

ХОТЫН ЦАГ АГААР

Үүлшинэ. Цас орохгүй. Салхи баруун өмнөөс секундэд 6-11 метр. Өдөртөө 0 градус орчим байна.

ХОНЬ, ЛУУ ЖИЛТЭНД ЭЭЛТЭЙ ӨДӨР

Буд гараг. Билгийн тооллын 20, Хэрцгий охин одтой, шарагчин гахай өдөр. Өдрийн наран 7 цаг 55 минутад мандан, 17 цаг 27 минутад жаргана. Тухайн өдөр хонь, туулай жилтнээ аливаа үйлийг хийхэд эерэг сайн ба могой, морь жилтнээ сөрөг муу нөлөөтэй тул элдэв үйлд хянамгай хандаж, биеэ энхрийлүүштэй. Эл өдөр эм, эмнэлгийн элдэв үйл, хагалгаа хийлгэх, биеийн тамирыг сэргээх, нялхасын хурим хийх, сүм дуганыг сэргээх, огторгуйн үүдийг боох, их хүмүүнтэй уулзахад сайн. Газар ухах, худаг гаргах, гөлөг тэжээх, балгадын суурь тавих, нохой худалдан авахад муу. Өдрийн сайн цаг нь үхэр, луу, морь, хонь, нохой, гахай болой. Хол газар яваар одогсод зүүн хойш мөрөө гаргавал зохистой. Үс шинээр үргээлгэх буюу засуулахад тохиромжгүй.

ӨНӨӨДӨР БОЛОХ ҮЙЛ ЯВДАЛ

09.00

• Нийслэлийн хүүхэд, гэр бүлийн хөгжлийн газар, НҮБ-ын Хүүхдийн сантай хамтран “Хүүхдийн эрх ба Бизнесийн зарчим” сургалтыг “Чингис” зочид буудалд зохион байгуулна.

11.00

• Уул уурхай, хүнд үйлдвэрийн сайд Д.Сумъяабазар салбарын ахмадууд болон эрдэмтэн судлаачид, ТББ-ын төлөөлөлтэй уулзана. Уулзалт Төр засгийн үйлчилгээний ‘Элит’ төвд болно.

11.30

• Канадын “Крис Дерксон Трио” хамтлагийн тоглолтын хэвлэлийн бага хурал “Монгол ньюс” мэдээллийн төвд болно. Тоглолт  арваннэгдүгээр сарын 9-нд болно.

12.00

• Гавьяат жүжигчин Г.Ариунбаатарын ‘Монгол сонгодог III’ бие даасан тоглолтын албан ёсны хэвлэлийн бага хурал “Монгол контент” ХХК-ийн байранд болно.
• ‘Одод болохын хүслэн’ тоглолтын талаарх хэвлэлийн хурал “Монгол ньюс” мэдээллийн төвд болно.

ӨНӨӨДРИЙН ЭВЕНТ

18.00

“Тэтгэлэгт хүрэх зам” өдөрлөг Corporate Hotel Convention Center-т болно. Өдөрлөгт оролцогчдод Австралийн боловсролын тогтолцоо, гадаад оюутан суралцах боломж, тэтгэлэгт хэрхэн хамрагдах вэ, судалгааны сэдвийг юун дээр үндэслэж сонгодог гэх мэт үнэтэй мэдээллийг Австралийн дээгүүр жагсдаг сургуулиудтай холбоотой байдаг гол төлөөлөгч өгөх бол судалгааны ажлаа хэрхэн зөв сонгох талаар МУИС-ийн мэргэжилтэн танилцуулга хийнэ.

18.20

Санхүү, эдийн засаг сонирхогч залуусын уулзалт “Blue Sky” зочид буудалд болно. Энэ удаагийн хүндэт зочноор ноён Тони Ватсон уригджээ. Тэрбээр ‘Азийн өндөр хүүтэй бондын зах зээлийн сүүлийн үеийн нөхцөл байдал’ гэсэн чухал сэдвийн хүрээнд илтгэл танилцуулж, хэлэлцүүлэг хийх юм. Илтгэх сэдвийн ерөнхий агуулга нь экспертийн өнцгөөс Азийн өндөр хүүтэй бондын зах зээлийн өнөөгийн нөхцөл байдлын тойм байх аж.  Ноён Тони Ватсон, CFA нь Азийн бондын зах зээл дээр 20 жил ажилласан туршлагатай нэгэн бөгөөд Far East Investment Management (Hong Kong) Ltd-д бондын багцын менежерийн албан тушаал хашдаг.