ӨНӨӨДӨР АРВАННЭГДҮГЭЭР САРЫН 07

ХОТЫН ЦАГ АГААР

Үүл багасна, цас орохгүй. Салхи баруун хойноос секундэд 6-11 метр. Өдөртөө 1-3 хэм хүйтэн байна.

Нүүдэл, суудал хийхэд тохиромжгүй

Ангараг гараг. Билгийн тооллын 19, Гөрөөсөн толгой одтой, шар нохой өдөр. Өдрийн наран 7 цаг 53 минутад мандан, 17 цаг 28 минутад жаргана. Тухайн өдөр бар, морь жилтнээ аливаа үйлийг хийхэд эерэг сайн ба бич, тахиа жилтнээ сөрөг муу нөлөөтэй тул элдэв үйлд хянамгай хандаж, биеэ энхрийлүүштэй. Эл өдөр буян номын үйлийг эхлэх, дээдсээс халамж хүсэх, лам хуврага болох, багш шавьд барилдах, номын абшиг авах, шинэ гэр ба байр авах, угаал үйлдэх, хүүхэд үрчлэн авах, тангарагаа буцаахад сайн. Нүүдэл суудал хийх, хэрүүл тэмцэл хийх, хүүхэд хөлд оруулахад муу. Өдрийн сайн цаг нь бар, луу, могой, бич, тахиа, гахай болой. Хол газар яваар одогсод баруун урагш мөрөө гаргавал зохистой. Өвлийн уур буух улирал 15 цаг 08 минутад эхэлнэ. Үс шинээр үргээлгэх буюу засуулбал “Сайн нөхөртэй учирах” ерөөлтэй сайн.

ЭНЭ ӨДӨР ДЭЛХИЙН ТҮҮХЭНД

Өнөөдөр Орост Октябрийн хувьсгал ялсан өдөр. 1917 оны энэ өдөр ЗХУ-д ажилчин, тариачны хувьсгал гарч, Владимир Ильич Ленин тэргүүтэй большевикууд Засгийн эрхийг авч байжээ. Энэ өдрийг монголчууд өмнө нь орон даяар нийтийн амралтын өдөр болгон тэмдэглэдэг байсан ч өнөөдөр мартагдсан баяруудын нэг болжээ. Монголчууд Октябрийн баярыг хамгийн сүллд 1989 онд орон даяар тэмдэглэсэн аж. Октябрийн баярын парадад жагсаагүй бол ажил тасалсанд тооцож, намын үүрийн товчооны хурлаар оруулж  донгоддог, Лениний зурагтай лоозон, улаан тугтай төв талбайд жагсдаг байсан дурсамж өнөөдөр түүх болон үлджээ.

ЭНЭ ӨДӨР МОНГОЛЫН ТҮҮХЭНД

1915.11.07 Түшмэл Цэдэвсүрэн, лам Чагдавжав нарын тэргүүтэй нийслэл хүрээний 18 худалдаачид хувь хөрөнгө нийлүүлж, “Монголын харилцан туслалцах хоршоо” байгуулжээ.

2011.11.07 Дээрхийн гэгээнтэн XIV Далай лам Данзанжамц найм дахь удаагаа Монголд айлчлав. Дөрвөн өдөр үргэлжилсэн энэ удаагийн айлчлалаар Дээрхийн гэгээнтэн оюутан, залуучуудад ‘Шинэ мянганы ёс зүй’ сэдэвт лекц уншиж, нийт сүсэгтэн олонд ‘Бодь мөрийн зэрэгийн тунгаамал алт’, ‘Шүтэн барилдлагын магтаал’, Жанрайсиг бурханы авшиг, Цагаан дарь эхийн насны авшиг айлджээ.

ӨНӨӨДӨР БОЛОХ ҮЙЛ ЯВДАЛ

09.00

• “Blue Sky” зочид буудалд “Хамгаалах бүс, хамгаалах малгайн хэрэглээг хэвшүүлснээр зам, тээврийн аюулгүй байдлыг сайжруулах” төслийн оролцогч талуудын уулзалт болно.

09.50

• ‘Тэнгис’ кино театрын Их танхимд Монгол Улсын Засгийн газраас гаргасан ‘Төрийн албан хаагчдын сахилга хариуцлагыг сайжруулах 01 тоот албан даалгавар’-ыг мэргэжлийн хяналтын улсын байцаагчидад танилцуулж, ёс зүйн мэдэгдэлд гарын үсэг зурах үйл ажиллагаа болно.

10.00

• НЗДТГ-т Хотын дарга С.Батболд нийслэлийн иргэдийг хүлээн авч уулзана.
• МҮХАҮТ, ОХУ-ын Алтайн хязгаар мужийн Худалдаа, аж үйлдвэрийн танхимтай хамтран зохион байгуулах Монгол-Оросын бизнес уулзалт МҮХАҮТ-ын байранд болно. Тус арга хэмжээний хүрээнд хоёр талын бизнес эрхлэгчдийн дугуй ширээний уулзалт, ганцаарчилсан уулзалтууд болох ба эрчим хүч, тоног төхөөрөмж, чацарганы шүүс, чацарганы тос, цахилгаан эрчим хүч, дулаан, халуун, хүйтэн усны узель, төмөр замын тээвэрлэлт, хөдөө аж ахуйн техник, үр тариа, будаа, гурил, малын тэжээл зэрэг салбарын бизнес эрхлэгчид харилцан туршлагаа солилцоно.

11.00

• ‘Зууны мэдээ’ сонины Үндэсний мэдээллийн төвд фэйсбүүк, твиттерийг хааж, хариуцлагатай, хяналттай үндэсний сүлжээтэй болох талаар Цахим халдлагаас ард иргэдийг хамгаалах Монголын нийгэмлэгээс хэвлэлийн хурал зарлажээ.

12.00

• МҮЭХ-ны байранд тус холбооны Ерөнхийлөгч Х.Амгаланбаатар цаг үеийн асуудлаар мэдээлэл хийнэ.
• Хятад улсын иргэн монгол эхнэртэйгээ нийлэн, Монгол Улсын иргэнийг амь насыг нь хөнөөлгөх захиалга өгснийг баримт, нотолгоотой дэлгэх хэвлэлийн бага хурал ‘Монгол ньюс’ мэдээллийн төвд болно.

15.00

• ‘Буянт-Ухаа’ спортын ордонд нийслэлийн Иргэдийн спортын VI наадмын шигшээ тэмцээний хаалтын ажиллагаа болно.

ӨНӨӨДРИЙН ЭВЕНТ

10.00

• Зураач Х.Ууганбаярын ‘Зоригдолын орон’ үзэсгэлэн уран зураг сонирхогчдын хүсэлтээр “UB ART GALLERY”-д дэлгэгдэх боллоо. Үзэсгэлэн арваннэгдүгээр сарын 13-ныг хүртэл 10.00-20.00 цагийн хооронд үргэлжилнэ.

16.00

• Сэтгэлзүйн лекц: ‘Шилжилтийн насны сэтгэлзүй’. Сурагчдын амралтад зориулан өсвөр насны буюу дунд сургуулийн ахлах ангийн сурагчдын онцлогт тулгуурласан сэдвээр унших сэтгэлзүйн лекцэд НҮБ-ын хүн амын сангийн төслийн арга зүйч Д.Өлзийсайхан уригдлаа. Тэрбээр сэтгэл заслын техникуудын талаар өсвөр насны охид, хөвгүүдтэй сонирхолтой яриа өрнүүлнэ. Хаана: “Өргөө 2” кино театрын замын эсрэг талд, Монголын Залуучуудын холбооны байрны 3 давхарт. Үнэ:10.000. Утас: 99917989, 99127006

18.45

• Оройны ‘6:45’ лекц. NOUS Mongolia ТББ-ийн 35 дахь ‘6:45’ лекц өнөөдөр товлогджээ. Өөртөө оюуны хөрөнгө оруулалт хийхийг хүссэн хүн бүрт зориулсан ‘6:45’ цуврал лекц, нетворкингийн энэ удаагийн хүндэт зочноор “Глобал удирдагч” дээд сургуулийн ерөнхийлөгч, Харвардын Их Сургуулийн Төрийн удирдлагын магистр Б.Отгонбат уригдаж, ‘Жинхэнэ манлайлал’ сэдвээр ярилцана. Хаана: “Holiday Inn” зочид буудал, 2 давхар, Хурлын танхим.

20.00

• Инээдмийн “UB Comedy” клубт Улаанбаатар хотын хамгийн халуухан инээдмийн шоу болох гэж байна. Энэ оройны хөтлөгч Амараа.