АНУ-ын ерөнхийлөгч Дональд Трамп Ази тивийн орнуудаар айлчлах 11 хоногийн айлчлалаа эхлүүлэхээр эх орноосоо морджээ. 

Япон, Өмнөд Солонгос, Хятад, Вьетнам болон Филиппинд буудаллах Трампын айлчлал АНУ-ын төрийн тэргүүний хувьд сүүлийн 25 жилийн хугацаан дахь хамгийн урт хугацааны аялал аж.

Айлчлалын гол сэдэв, зорилго Хойд Солонгосын цөмийн хөтөлбөр, шил шилээ дагасан пуужингийн туршилт, Солонгосын хойгийн хямралыг шийдэх явдал юм.

Ноён Трамп Өмнөд Солонгос болон Японтой хүч хавсарч Пхеньяны эсрэг нэгдсэн байр суурьт хүрэх асуудлаар Хятадыг ятгах, гарцаагүй байдалд шахах байдлаар хандана гэгдэж байна.

Дональд Трамп өнөөдөр /орон нутгийн цагаар 2017.11.03/ Хавай мужийг зорьж, Дэлхийн II дайнд амь үрэгдсэн цэрэг эрсийн дурсгалыг хүндэтгэх арга хэмжээнд оролцжээ. 

Тэндээс Трамп тэргүүн хатагтай Меланья Трампын хамт Японыг зорьж, дараа нь БНСУ-д очих ажээ. 

Дональд Трампын айлчлалын товч хөтөлбөр:

• 2017.11.05. Ням гариг: Японд очно. Ерөнхий сайд Шинзо Абэ, мэргэжлийн гольфчин Хидэки Мацүяама нартай гольф тоглож, дараа нь Шинзо Абэтэй уулзалт хийнэ.
   
• 2017.11.07. Мягмар гариг: Өмнөд Солонгост тус улсын ерөнхийлөгч Мүүн Жэй-интэй албаны уулзалт хийнэ. Трамп мөн БНСУ-ын Үндэсний ассамблейн чуулганд үг хэлнэ.
   
• 2017.11.08. Лхагва гариг: Хятадад очиж, тус улсын дарга Си Жиньпинтэй уулзана. Өөр хэд хэдэн чухал уулзалт, арга хэмжээнд оролцоно.
   
• 2017.11.10. Баасан гариг: Вьетнамын Данангт очиж, Ази-Номхон далайн эдийн засгийн хамтын ажиллагааны байгууллагын дээд төвшний уулзалтад оролцоно.
   
• 2017.11.11. Бямба гариг: Вьетнамын нийслэл Ханойд очиж, тус улсын ерөнхийлөгч Тран Дай Куанг болон бусад удирдах төвшний хүмүүстэй уулзана.
   
• 2017.11.12. Ням гариг: Филиппиний нийслэл Манилад очиж, Зүүн Өмнөд Азийн орнуудын холбоо /АСЕАН/-ны 50 жилийн ойд зориулсан хүндэтгэлийн хүлээн авалтад оролцоно.
   
• 2017.11.13. Даваа гариг: Манилад болох АСЕАН-ы чуулга уулзалтад оролцож, Филиппиний ерөнхийлөгч Родриго Дутертетэй уулзалт хийнэ.

С.ЦЭЛМЭГ