IJF буюу Олон улсын жүдо бөхийн холбооноос зургадугаар сарын 25, 26-нд Бразилийн Сан Паулу хотод, дараа нь долдугаар сарын 1, 2-нд АНУ-ын Майамид болсон “Дэлхийн цом”-ын тэмцээний дараа жин, жингийн бөхчүүдийн чансааны жагсаалтыг шинэчлэн гаргажээ. IJF-ийн тэмцээн, уралдааны календарчилсан төлөвлөгөөнд багтсан “Дэлхийн цом”, “Гран-при”, “Их дуулга” цуврал тэмцээнээс гадна жин жингийн шилдэг 16 бөхийн халз тулаан “Мастерс”, тив, дэлхийн аварга шалгаруулах тэмцээн болон олимпийн наадмаас зэрэглэл тогтоон оноо олгодог. Мэдээж олимпийн наадам хамгийн өндөр буюу 600 оноо олгоно. “Дэлхийн цом”-ын тэмцээний тухайд чансаагаар хамгийн бага буюу түрүүлсэн тамирчинд 100 оноо олгодог. Гэхдээ давтамж нь олон, жилийн туршид 16 “Дэлхийн цом”-ын тэмцээн болох хуваарьтай. Хэдийгээр чансаа бага ч олимпийн наадам дөхсөн үед жүдочдын хувьд чансаагаа ахиулах бас нэгэн боломж юм.  Учир нь жингийнхээ ангилалд чансааны топ 20-д багтсан тамирчид олимпийн татамид гарах болзлоо хангасан гэсэн үг.

Сан Паулугийн “Дэлхийн цом”-оос Монголын жүдочид хос алт, нэг мөнгө, нэг хүрэл медаль зүүсэн. Эрэгтэйчүүдийн 73 кг-ын жинд зодоглосон ОУХМ С.Ням-Очир аваргын төлөөх тулаанд нутаг нэгт Х.Цагаанбаатарыг цаг сунган юүкогоор ялснаар аваргын тавцанд гарч, чансаагаа 100 оноогоор ахиулсан. Мөн эмэгтэйчүүдийн 63 кг-д ОУХМ Ц.Мөнхзаяа аваргын алтан медалийн эзэн болсон билээ. Ингэснээр чансаагаараа 12 дугаарт эрэмбэлэгдээд байсан тэрбээр 712 оноотой есдүгээр байрт бичигдлээ.  Харин ОУХМ С.Ням-Очир 16 дугаар байраа 12 хүртэл ахиулж чаджээ. Монгол Улсын Хөдөлмөрийн баатар, гавьяат тамирчин Х.Цагаанбаатарын тухайд Сан Паулугийн “Дэлхийн цом”-д аман хүзүүдэж, залгуулаад Майамигийн татамид түрүү авсан ч жин өгсч, 73 кг-д хүч үзсэн учир үндсэн жин болох 66 кг-ын чансаандаа оноо нэмж чадаагүй. Гэхдээ 66 кг-ын жингийн ангилалд дэлхийн чансааг сүүлийн гурав гаруй жилийн турш тасралтгүй тэргүүлж буй тэрбээр 73 кг-ын жинд 200 оноотой 39 дүгээрт эрэмбэлэгдлээ. Мөн дараалсан хоёр “Дэлхийн цом”-оос хүрэл медаль ихэрлүүлсэн Г.Болдбаатар өдгөө 60 кг-ын жинд 562 оноотой 14 дүгээр байрт бичигдээд байна.

Олимпийн эрхийн болзол бүхий жин, жингийн чансааны жагсаалтын топ 20-д Монголын нийт 12 жүдоч багтаад буй.

Монголын жүдочид дэлхийн чансаанд:

Эрэгтэй 60 кг:
1.    Ришод Собиров /Узбекистан/ – 2130 оноо
2.    Георгий Зантарая /Украйн/ – 1224
3.    Хироаки Хираока /Япон/ – 1120
…13. Д.Төмөрхүлэг /Монгол/ – 582
…14. Г.Болдбаатар /Монгол/ – 562
17. Ч.Болдбаатар /Монгол/ – 510

Эрэгтэй 66 кг:
1.    Х.Цагаанбаатар /Монгол/ – 1478 оноо
2.    Алим Гаданов /ОХУ/ – 1310
3.    Жунпей Моришита /Япон/ – 1244
… 9. С.Мияарагчаа /Монгол/ – 696

Эрэгтэй 73 кг:
1.    Ван Ки-Чун /БНСУ/ – 1524 оноо
2.    Рики Накая /Япон/ – 1078
3.    Дирк ван Тичелт /Бельги/ – 1010
… 12. С.Ням-Очир /Монгол/ – 570

Эрэгтэй 81 кг:
1.    Ким Жэ-Бум /БНСУ/ – 1760 оноо
2.    Леандро Гуильерро /Бразил/ – 1520
3.    Элнур Маммадли /Азербайжан/ – 934
…55. О.Ууганбаатар /Монгол/ – 140

Эрэгтэй 90 кг:
1.    Илиас Илиадис /Грек/ – 1396 оноо
2.    Такаши Оно /Япон/ – 1366
3.    Дайки Нишияма /Япон/ – 1298
…37. Э.Энхбат /Монгол/ – 226

Эрэгтэй -100 кг:
1.    Такамаса Анаи /Япон/ – 1716 оноо
2.    Хенк Грол /Голланд/ – 1224
3.    Максим Раков /Казахстан/ – 1114
… 13. Б.Тэмүүлэн /Монгол/ – 598
14. Н.Түвшинбаяр /Монгол/ – 582

Эрэгтэй +100 кг:
1.    Тедди Ринье /Франц/ – 2030 оноо
2.    Ислам эль Шехаби /Египет/ – 1520
3.    Андреас Тоелцер /Герман/ – 1186
…74. Б.Сугаржаргал /Монгол/ – 61
…90. Х.Мөнхбаатар /Монгол/ – 40

Эмэгтэй 48 кг:
1.    Харуна Асами /Япон/ – 1910 оноо
2.    Томоко Фүкүми /Япон/ – 1830
3.    Алина Думитру /Румын/ – 1110
… 16. М.Уранцэцэг /Монгол/ – 566
… 26. Б.Бат-Эрдэнэ /Монгол/ – 306

Эмэгтэй 52 кг:
1.    Юүка Нишида /Япон/ – 1860 оноо
2.    Мисато Накамура /Япон/ – 1660
3.    М.Бундмаа /Монгол/ – 1292

Эмэгтэй 57 кг:
1.    Каори Мацүмото /Япон/ – 1850 оноо
2.    Тельма Монтейро /Португаль/ – 1478
3.    Сабрина Фильцмозер /Австри/ – 1164
… 29. Т.Баттөгс /Монгол/ – 284

Эмэгтэй 63 кг:
1.    Ёшиэ Уэно /Япон/ – 1888 оноо
2.    Гевриз Эманэ /Франц/ – 1760
3.    Элизабет Виллебордс /Голланд/ – 978
… 9. Ц.Мөнхзаяа /Монгол/ – 712

Эмэгтэй 70 кг:
1.    Люси Деко /Франц/ – 1832 оноо
2.    Эдит Бош /Голланд/ – 1370
3.    Хван Е-Сүл /Өмнөд Солонгос/ – 1200
… 29. Ц.Наранжаргал /Монгол/ – 250

Эмэгтэй -78 кг:
1.    Акари Огата /Япон/ – 1424 оноо
2.    Каяла Харрисон /АНУ/ – 1386
3.    Ян Сьюли /Хятад/ – 1326
…13. П.Лхамдэгд /Монгол/ – 638

Эмэгтэй +78 кг:
1.    Мегүми Тачимото /Япон/ – 1860 оноо
2.    Мика Сүгимото /Япон/ – 1210
3.    Цинь Цьян /Хятад/ – 1134
…27. Д.Цэрэнханд /Монгол/ – 277