Энэ удаагийн сурвалжлагаа Баянгол дүүрэгт үйл ажиллагаа явуулдаг “Exclusive” компанийн оёд­лын үйлдвэрээс бэлтгэсэн юм. Уг үйлдвэрийнхэн өдөр тутмын бо­лон ажлын хувцас үйлдвэрлэж Мон­голдоо төдийгүй гадны хэд, хэ­дэн оронд борлуулдаг ажээ. Өчигдөр 11 цагийн үед үйлдвэр дээр очсон. Хаалгаар нь оронгуутаа тэнд өлгөөтэй байсан хувцаснуудыг харж, барьж үзээд  Монголд үйлдвэрлэсэн хувцас, монгол барааны талаарх тө­сөөлөл маань огт өөр болсон юм. Энэ үйлдвэрийнхний оёсон хувцас үнэ­тэй зарагддаг гадны брэндийн хувцаснаас огт дутахааргүй юм би­лээ. Тэгээд ч үнэ харьцангуй хямд аж. Монголчуудад байдаг нийтлэг сэтгэлгээ юм уу даа. Оёсон хувцасыг нь харсан хүмүүс “Монголд ийм хувцас хийдэг юм уу” гэж гайхдаг гэсэн.

Хамгийн гол нь “Eхclusive” компа­нийнхан үйлдвэрлэлээ явуулахын зэ­рэгцээ дэргэдээ сургалтын төв ажил­луулж, Баянгол дүүргийн ажилгүй иргэдэд монгол, европ хувцас оёх арга, технологийг үнэ төлбөргүй зааж байгаа аж.  Сургалтын төв бай­гуулах саналыг тус дүүргээс УИХ-д сонгогдсон гурван гишүүний нэг Ц.Мөнх-Оргил гаргаж, бүхий л та­лаар тусалж, дэмжсэн байна. Сур­галтын төвийн нээлтийг энэ оны гу­равдугаар сарын 8-нд хийж байсан билээ. “Exclusive” компанийн захирал Г.Майцэцэг “Манайх 2009 оноос үйл ажиллагаа явуулж эхэлсэн. Бид тэр үедээ Баянгол дүүргээс УИХ-д сонгогдсон гурван гишүүнд хандаж “Бидний үйл ажиллагааг дэм­жээч” гэсэн хүсэлт тавьж байсан юм. Тэгэхэд Ц.Мөнх-Оргил гишүүн бид­ний саналыг хүлээж аваад “Боловсон хүчин бэлтгэхэд бүхий л талаар тусалъя” гэсэн юм. Үйлдвэрлэл явуу­лахад хамгийн гол хүчин зүйл нь ажиллах боловсон хүчин байдаг. Манай улсад мэргэжлийн оёдолчин, эсгүүрчин, технологич бэлддэг сургууль бараг байхгүй гэж болно. Ажиглаад байхад үйлдвэрлэл явуулж байгаа хүмүүсийн “толгойны өвчин” нь боловсон хүчний асуудал байдаг юм билээ. Одоо хоёр дахь ээлжийнхээ сургалтыг ерөнхийдөө дуусгачихаад байна. Төгсөгчдийн маань зарим нь манай үйлдвэрт ажиллаж байгаа” гэж ярилаа.

Ямартай ч одоогоор европ, монгол хувцас оёх, сүлжмэл, нэхмэл эдлэл хэрхэн хийхийг заадаг 45 хоногийн сур­галтад Баянгол дүүргийн 60 га­руй хүн хамрагдаад байгаа ажээ. Сургалтын төвд суралцсан хүмүүс бүгд ажлын байртай болсон байна. Түүнч­лэн өөрийн гэсэн жижиг оёдлын цех байгуулсан хүмүүс ч бай­гаа гэнэ. Г.Майцэцэг захирал “Ц.Мөнх-Оргил гишүүний хамгийн гол хүсэж байгаа зүйл нь айл бүрийг өр­хийн үйлдвэрлэлтэй болгох, сан­хүү, мөнгөний эх үүсвэртэй бол­гох явдал гэж би хувьдаа ойлгож байгаа. Манай компани л гэхэд төгсөгчдөөрөө хув­цасаа за­хиалж оёулдаг болсон. Зарим хү­мүүсийн хувьд өөрсдөө хувцас оёод, борлуулах нь хүндрэлтэй бай­даг шүү дээ. Дүүргийн 60 гаруй хүнийг сургалтад хамруулсан гэдэг маань төдий тооны өрхийг тодорхой амьжиргааны эх үүсвэртэй болгож байгаа байх” гэлээ. Үйлдвэрийн ажил­чидтай уулзахад “300 мянгаас нэг сая хүртэлх төгрөгийн цалин ав­даг. Нарийн мэргэжил эзэмшсэн хү­мүүс Монголдоо өндөр цалинтай ажил хийж болдог” хэмээн ярилаа.

Х.Отгончимэг: -Би сургалтын төв нээлтээ хийж, үйл ажиллагаа явуулж эхлэхэд эхний ээлжийн сургалтад хамрагдсан. Би өөрөө оёдолчин. Хэчнээн юм оёж чаддаг байсан ч сургалтад суус­наа­раа өөр төрлийн хувцас оёж сур­сан. Өмнө нь Чех,  Унгар улсад ажил­лаж  байхдаа дандаа европ хув­цас оёдог байсан. Одоо  бол Мон­гол үндэсний хувцасаа хийж  сур­сан. Сургалтад хамрагдсан хүмүүсийн хувьд амьдралд нь то­дор­хой хэмжээгээр дэмжлэг болж чадсан. Зарим нь оёдол, сүлжмэлийн компанид ажилд орсон. Тухайн хүний амьдрал 100 хувь биш юм гэхэд тодорхой хэмжээгээр дээшилж л  байгаа. Хүмүүс гэрээрээ ажиллах со­нирхолтой болсон. Түүнчлэн гэрээрээ үндэсний хувцас оёж байгаа хүмүүс ч олон бий. Гэрээсээ гарах бо­ломжгүй, хүүхдээ харж байгаа олон эмэгтэйчүүд байдаг шүү дээ. Би одоо өөрийн сурсан, мэддэг зүйлээ компанидаа ажиллаж байгаа залуу охиддоо сургах юмсан гэж бодож явдаг юм.

Э.Сарангоо: -Би уг нь барилгын засал чимэг­лэлчин мэргэжилтэй. Сургалтад хам­рагдаад оёдолчин болсон. Төг­сөн­гүүтээ мэргэжлийнхээ дагуу “Exclusive” компанид ажилд орсон.  Цаа­шид ч энэ мэргэжлээрээ ажиллах бодолтой байгаа.